«Նոյյան տապանը» պետք է անպայման կառուցվի և պետք է կառուցվի հենց Հաղթանակի զբոսայգու հարևանությամբ: Այս մասին այսօր լրագրողների հետ հանդիպման ժամանակ հայտարարեց գրող, հրապարակախոս Մերուժան Տեր-Գուլանյանը՝ միաժամանակ հավելելով, որ տարիներ անց գուցե իրավիճակ փոխվի, և սերունդները այն ապամոնտաժեն ու տանեն, Արարատ լեռան վրա դնեն:
«Դա Աստծո ուղարկած նամակն է, որը պետք է բացել»,- հավաստիացրեց նա:
Ընդ որում, Մ. Տեր-Գուլանյանի խոսքով, այն «բարերարը, որը 40 մլն դոլար է հատկացնում տապանի կառուցման համար, ցանկանում է, որ այն լինի հենց Երևանի կենտրոնում»: Գրողը վստահեցրեց, որ կառույցը չի խանգարելու լանդշաֆտին, քանի որ պետք է փորվի և իջեցվի: Նա ներկայացրեց Հաղթանակ զբոսայգու այսօրվա վիճակը՝ 125 հա այգուց մնացել է ընդամենը 25 հա, իսկ «Նոյյան տապանը» զբաղեցնելու է 3 հա և, եթե չկառուցվի այս տապանը, ապա նախատեսվում է կառուցել «փոքրիկ Դուբայ»՝ ատրակցիոններ, ռեստորաններ և այլն. «Ով դեմ է տապանին՝ կողմ է այդ նախագծին»:
Նկարիչների միության նախագահ Կարեն Աղամյանի խոսքով՝ «Գորալ գրուպ» ընկերության ներկայացրած երկրորդ նախագիծը զբաղեցնելու է Հաղթանակի զբոսայգու ողջ տարածքը, և շատ դեպքերում ատրակցիոններն ավելի բարձր են, քան այն հուշարձանը, որին պետք է ծառայի այգին: Այդ նախագծում կան «ամերիկյան բլուրներ» ատրակցիոններ, գինու այգի, խանութներ, ռեստորաններ, ամֆիթատրոն և շատ այլ բաներ:
Քանդակագործ, նկարիչ Հաղթանակ Շահումյանի կարծիքով՝ Նոյը հավաքական կերպար է և ժողովրդին է պատկերում, քանի որ իրականում մի մարդու ընտանիքի շրջանակներում մարդկությունը չէր կարող վերածնվել` գենետիկ տեսանկյունից դա հնարավոր չէ, մուտացիաներ են առաջանում, և չի կարելի, որ այդ տապանը կառուցվի զբոսայգու հարևանությամբ:
Ի պատասխան «Առաջին լրատվական»-ի հարցին, որ պաշտոնյաները խոսում են ենթակառուցվածքների և մարզերի զարգացման, ապակենտրոնացման մասին, ինչո՞ւ պետք է հենց այդ տարածքում կառուցվի, Մ. Տեր-Գուլանյանը հայտարարեց, որ եթե տապանը չկառուցվի, ապա կիրականացվի ատրակցիոնների նախագիծը:
Նա վրդովվեց մեր դիտարկումից, որ կարելի է 2-ն էլ չկառուցել և այգին վերականգնել. «Երբ որ «Գոլդեն Փալաս» հյուրանոցն էր կառուցվում, մենք՝ «Ար» հեռուստաընկերությունը, այնքան պայքարեց դրա դեմ, որ Ռոբերտ Քոչարյանի հետ հարաբերությունները վերջնականապես վատացան: Որտե՞ղ էիք, որ այդ շենքերը կառուցվում էին: Մարդիկ ուզում են 40 մլն դոլար տալ ու տալիս են այդ տեղի համար: Ինձնից ավելի մի պաշտպանեք լանդշաֆտը»: Նա նշեց, որ Երևանի կենտրոնն այնքան ծանրաբեռնված է, որ տապանը չի խանգարելու, այլ միայն օգնելու է պատկերին:
Հ. Շահումյանը հակադարձեց, որ ազգային արժեքները չպետք է շահարկել և հայրենիքի սիրո խնդիր չկա, կա հայրենիքին ծառայելու խնդիր: Ըստ նրա՝ այդ գումարն ավելի նպատակային կարելի էր ծախսել՝ ֆիլմ նկարահանել, որն ավելի շատ մարդ կտեսներ, քան այն 10 զբոսաշրջիկը, որ կայցելեն տապանի տարածքում գտնվելիք թանգարան, կամ հնագիտական պեղումերի համար ծախսեին և այլն:
«Ամեն մի քառակուսի մետրը դարձել է առուփախի առարկա: Հիմա սխալ է դնելը: Պետք է ժամանակ անցնի: Նույնիսկ հրապարակի արձանի տեղադրումն ենք հետաձգում»,- ասաց Հ. Շահումյանը և հավելեց. «Օտարը պետք է գա ու զարմանա մեր գավառական մտածողության վրա»:
