«Մեր նախընտրական ցուցակը մեր իրականության հայելին է: Ապագա խորհրդարանում մենք կունենանք ավելի լավ ցուցանիշներ, քան 2007-ի ցուցանիշներն էին, և կապահովենք մեծամասնություն»,- այսօր ասուլիսի ժամանակ հայտարարեց ՀՀԿ պատգամավոր Արտակ Դավթյանը: Նա նշեց, թե ցուցակում օրենքով թույլատրվում է համամասնական տեղերի եռապատիկ քանակով` 270 թեկնածու ընդգրկել:
Անդրադառնալով «Ազատ դեմոկրատներ»-ի ցուցակին` Ա. Դավթյանը ողջունեց այդ կուսակցության և «Ժառանգության» փոխհամաձայնությունը: Նրա խոսքով՝ ընտրություններին դաշինքով գնալու պարագայում մի փոքր ավելի բարձր շեմ է նախատեսված, բայց սա բավականին աննախադեպ քայլ է. մինչ այս նման բան տեղի չէր ունեցել: Պատգամավորը չունի դաշինքի կազմած ցուցակի վերաբերյալ որևէ բացասական դիտարկում:
Ըստ «Ազատ դեմոկրատներ»-ի վարչության անդամ Արմեն Առաքելյանի՝ «Սերժ Սարգսյանի և ՀՀԿ նպատակը նախագահական ընտրություններին նախապատրաստվելն է»:
Նա սխալ համարեց, որ ՀՀԿ ցուցակում ընդգրկվել են բոլոր մարզպետները և նախարարները, որոնք առանձնապես ոչ մի օգուտ չեն տալիս, սակայն ակտիվ դերակատարում ունեն չերևացող գործերում, և «ամեն ինչ անելու են, որ թիվ ապահովեն»:
Ա. Առաքելյանի խոսքով՝ երկու կուսակցությունների միավորմամբ «Ժառանգություն»-ը շատ ավելի մեծ ներկայացվածություն կունենա, քան նախորդ ԱԺ-ում:
