«Սերժ Սարգսյանի առաջադրած պատգամավորության թեկնածու Սամվել Ալեքսանյանին հրավիրում եմ հեռուստաբանավեճի»,- այսօր լրագրողների հետ հանդիպման ժամանակ ասաց ՀԱԿ ներկայացուցիչ, «Հայկական ժամանակ» օրաթերթի գլխավոր խմբագիր, թիվ 7 ընտրատարածքում առաջադրված պատգամավորության թեկնածու Նիկոլ Փաշինյանը:
Նա նշեց, որ ընդդիմության միասնական թեկնածուի շուրջ ՀԱԿ-ը պատրաստ է քննարկել ցանկացած տրամաբանական առաջարկ: «ՀԱԿ թեկնածուների առաջադրումներն ինքնանպատակ չեն: Մենք թեկնածու ենք առաջադրել քաղաքական լուրջ պլաններ իրագործելու համար: Եթե կա լուրջ առաջարկ, որը կնպաստի ընտրողների ազատ կամարտահայտմանը, մենք պատրաստ ենք:
Մի քանի օրից սկսվում է ընտրարշավը, և տրամաբանական չէ, որ սկսենք քննարկումներ. ընդդիմությանն այս ընտրարշավից շեղելը ճիշտ չեմ համարում»,- ասաց Ն. Փաշինյանը:
Ըստ նրա՝ ինքը առաջադրվել է թիվ 7 ընտրատարածքում, և իր հաղթանակով լուրջ նախադրյալներ կստեղծվեն ՀՀ-ում քաղաքական իրավիճակի շղթայական փոփոխության առումով՝ ընտրատարածքի ընտրողներին խոստանալով, որ լինելու է բուռն ընտրարշավ:
Հաշվի առնելով հասարակական ուշադրությունը թիվ 7 ընտրատարածքի հանդեպ՝ Նիկոլ Փաշինյանը Սամվել Ալեքսանյանին հրավիրեց հեռուստաբանավեճի և Հայաստանի հեռուստաընկերություններին կոչ արեց կազմակերպել այդ բանավեճը: «Խոստանում եմ, որ այն իր դիտումների թվով ամենամեծն է լինելու: Սամվել Ալեքսանյանը ՀՀԿ ցուցակում է հայտնվել, ՀՀԿ-ն ասում է, թե նա բիզնեսմեն չէ, ուրեմն քաղաքական գործիչ է՝ բանավեճ անցկացնենք և ցույց տանք, թե ինչպիսի քաղաքական գործիչ է: Սերժ Սարգսյանի առաջադրած թեկնածուին հրավիրում եմ հեռուստաբանավեճի, որպեսզի հանրությունը տեսնի, թե Սերժ Սարգսյանն ինչպիսի գործիչներով է պատրաստվում է կառավարել երկիրը»,- եզրափակեց Նիկոլ Փաշինյանը:
