Թուրքական Zaman թերթի փոխանցմամբ՝ Թուրքիայի վարչապետ Ռեջեփ Էրդողանը երեկ Հարավային Կորեայում հանդիպել է ԱՄՆ նախագահ Բարաք Օբամայի հետ:
Հանդիպումը տևել է 1.5 ժամ, որի ընթացքում կողմերը քննարկել են երկկողմանի հարաբերությունների հարցը, Սիրիայում առկա իրավիճակը, Իրանի միջուկային ծրագիրը, Աֆղանստանի հարցը, PKK-ի դեմ պայքարը, ինչպես նաև Հայոց ցեղասպանության ճանաչման ու Լեռնային Ղարաբաղի հարցերը:
Էրդողանը հայտարարել է, որ ԵԱՀԿ Մինսկի խումբը գործում է արդեն 20 տարի, սակայն ցայժմ որևէ առաջընթաց չի գրանցվել: Էրդողանն առաջընթացի գրանցման համար կարևորել է իրենց կողմից Ադրբեջանի հետ տվյալ խնդրի շուրջ աշխատելը և ԵԱՀԿ Մինսկի խմբի համանախագահող երկրների (ԱՄՆ, Ֆրանսիա, Ռուսաստան) կողմից Հայաստանի հետ աշխատելը:
Բացի այդ, Էրդողանն Օբամային իր անհանգստությունն է հայտնել՝ կապված ԱՄՆ Կոնգրեսում Հայոց ցեղասպանության ճանաչման բանաձևի ի հայտ գալու հետ: Էրդողանն Օբամային հայտարարել է, որ իրենք հոգնել են ամեն տարվա ապրիլին այդ նույն սցենարից՝ ընդգծելով, որ դա տեղի է ունենում թե՛ հանրապետականների, թե՛ դեմոկրատների կառավարման ժամանակաշրջանում:
Էրդողանն ամերիկացի կոնգրեսականներին խորհուրդ է տվել իրենց չդնել պատմաբանների տեղ:
