Մեծ Բրիտանիայում իշխող Պահպանողական կուսակցության ամենամեծ ֆինանսիստներից մեկը` Փիթեր Քուրդասը, հրաժարական է տվել այն բանից հետո, երբ լրագրողները նրան մեղադրել են վարչապետի և ֆինանսների նախարարի մոտ մուտք ունենալու իրավունքը 250 հազար ֆունտով` գրեթե 400 հազար դոլարով վաճառելու մեջ:
Կիրակի օրը Sunday Times թերթը հրապարակել է մի տեսանյութ, որտեղ երևում է, թե ինչպես է Քուրդասը քննարկում մի շարք պաշտոնական անձանց հետ հանդիպում կազմակերպելու հարցը` պահպանողականների օգտին որոշակի նվիրաբերության դիմաց: Հավանական կուսակցական դոնորների դերում հանդես են եկել են լրագրողներ, որոնք իրենց ներկայացրել են որպես Zenith ընկերության ներկայացուցիչներ:
Ձայնագրության մեջ Քուրդասը նշում է, որ նվիրաբերությունների դիմաց նրանք կարող են մուտք գործել կառավարություն և հանդիպել կառավարության անդամներին:
«Եթե խոսենք ձեր նվիրաբերությունների մասին, ապա առաջին բանը, որ մենք կանենք` ձեզ կուղարկենք Քեմերոնի (վարչապետ) և Օսբորնի (ֆինանսների նախարար) հետ ճաշի: Դուք կարող եք շատ տեղեկություններ իմանալ, եթե հանդիպեք վարչապետի հետ… Դուք կարող եք նրան ամեն ինչի մասին հարցնել»,- ասում է Քուրդասը:
Sunday Times-ը տեղեկացնում է, որ կեղծ Zenith ընկերությունը ֆոնդ է, որը գրանցված է Լիխտեյնշտեյնում: Ըստ բրիտանական օրենքի` օտարերկրյա կազմակերպությունը չի կարող ֆինանսավորել երկրի քաղաքական կուսակցություններին:
Այս խոսակցության հրապարակումից հետո Քուրդասը հայտարարել էր իր հրաժարականի մասին. նա 2011թ.-ի հունիսից զբաղեցնում էր կուսակցության ֆինանսիստի պաշտոնը:
«Ես ցավում եմ, որ իմ ասածից տպավորություն է ստեղծվել, թե խոսքը անհարիր գործողությունների մասին է»,- հայտարարել է Քուրդասը կիրակի վաղ առավոտյան:
Նա նաև հավաստել է, որ Zenith-ի հետ հանդիպումը եղել է իր նախաձեռնությունը, և կուսակցությունից ոչ մեկի հետ ինքը չի խորհրդակցել:
