CNN ամերիկյան հեռուստաընկերությունը հերքել է ահաբեկիչների հետ իրենց համագործակցության մասին սիրիական իշխանությունների մեղադրանքը:
Մարտի 22-ին սիրիական պետական հեռուստատեսությունը հայտարարել էր, որ CNN-ի լրագրողները կապ են ունեցել Հոմսի նավթամուղի պայթեցման հետ:
CNN-ին մեղադրանք էր ներկայացվել այն բանից հետո, երբ սիրիական հեռուստաալիքով ցուցադրվել էին հատվածներ «72 ժամ կրակի մեջ» (72 hours under the fire) փաստագրական ֆիլմից: Ֆիլմում պատմվում է այն բարդությունների և խոչընդոտների մասին, որոնց բախվել են CNN-ի լրագրողները Հոմսի իրադարձությունները լուսաբանելիս:
Սիրիական պետական հեռուստաալիքը հայտարարել էր, որ լրագրողներն անօրինական են մուտք գործել Սիրիա և կազմակերպել են նավթամուղի պայթյունը, որպեսզի նկարահանեն այն:
CNN International-ի ղեկավար Թոնի Մեդոքսը մեղադրանքն անվանել է «անհեթեթ » և հավաստիացրել, որ հեռուստաընկերությունը պահպանում է լրագրողության բարձր չափանիշները:
Սիրիական իշխանություններն ահաբեկիչների հետ համագործակցելու մեջ մեղադրում են նաև այլ ԶԼՄ-ների, մասնավորապես՝ «Ալ-Ջազիրա» հեռուստաընկերությանը:
