Արդարադատության նորանշանակ նախարար Հրայր Թովմասյանի պաշտոնավարման 100 օրը չի լրացել, սակայն այսօր, հանդիպելով լրագրողների հետ, նա ասաց, թե հուսով է՝ Նապոլեոնը իրենից չի նեղանա: «Պաշտոնավարման 100 օրը թե՛ երկար, թե՛ կարճ ժամանակահատված է անելիքները ներկայացնելու համար: Իմ մեկամսյա պաշտոնավարման ընթացքում, որից 14 օրը եղել է տոնական, արդեն իսկ պարզ են առաջիկա անելիքները»:
Թովմասյանը նշեց, որ ինքը պատրաստ է մամուլի հետ բաց երկխոսության։ Նաև սահմանվելու են առկա խնդիրները, և ներկայացվելու է փիլիսոփայությունը, որով պետք է լուծել այդ խնդիրները: Արդարադատության նախարարը նկատեց, որ իր նշանակման վերաբերյալ կար երկու կարծիք. մի մասը համարում էր, որ ինքը նոր մարդ է և կարող է բարեփոխում իրականացնել համակարգում, մյուս մասի կարծիքով էլ, նախարարը կձախողվի, քանզի նա այս քաղաքական իրականության մեջ անելիք չունի: «Ես ջանալու եմ իրականացնել առաջին խմբի սպասելիքները, ես ասում եմ ո՛չ կարճաժամկետ պոպուլիստական լուծումներին, չկան անլուծելի խնդիրներ, կան դրանք լուծելու կարողություն և ցանկություն չունեցող մարդիկ: Իմ կարծիքով, բոլոր խնդիրներն էլ լուծելի են, և ես հաջորդականությամբ լուծելու եմ դրանք»,- նշեց արդարադատության նախարար Հրայր Թովմասյանը:
