Մեքսիկայի գերագույն դատարանը հրաժարվել է ազատ արձակել 60 տարվա ազատազրկման դատապարտված ֆրանսուհի Ֆլորանս Կասեին: Այս մասին հաղորդում է France Presse գործակալությունը:
Այս վճռին մեծ ուշադրությամբ հետևում էին Ֆրանսիայում, հեռուստատեսությամբ անընդհատ ռեպորտաժներ էին տրվում այդ մասին: Սակայն երեկ Գերագույն դատարանի 5 անդամներից 3-ը ֆրանսուհու ազատ արձակմանը դեմ արտահայտվեցին:
Նշվում է, որ մեքսիկական դատարանում այս հարցը նորից քննարկման էր դրված այն պատճառով, քանի որ պարզվել էր` նախկինում քննության ընթացքում թույլ են տրվել բազմաթիվ խախտումներ: Թեպետ երեկվա որոշումը բացասական է եղել, սակայն դեմ քվեարկած 3 դատավորներից 2-ի կարծիքով` անհրաժեշտ է նոր քննություն անցկացնել:
Reuters գործակալության փոխանցմամբ` Ֆրանսիայի արտաքին գործերի նախարարությունն արդեն ափսոսանք է հայտնել այս որոշման կապակցությամբ:
Տեղեկացնենք, որ Կասեն ու նրա ընկերը ձերբակալվել էին 2005թ.-ին. նրանց մեղադրել էին իրենց ռանչոյում պատանդներ պահելու մեջ: Կասեն այս մեղադրանքները հերքել էր` նշելով, թե չի իմացել, որ այդ մարդիկ իրենց կամքին հակառակ են գտնվում ռանչոյում: Սկզբում դատարանը նրան ազատազրկել էր 98 տարով, հետո այդ պատժամիջոցը մեղմացվել էր` մինչև 60 տարի:
Այս ֆոնին լարվել են հարաբերությունները Մեքսիկայի և Ֆրանսիայի միջև: Նիկոլա Սարկոզին մի քանի անգամ դիմել էր Մեքսիկայի իշխանություններին` Կասեին Ֆրանսիային արտահանձնելու առաջարկով:
