Այն, որ Սիրիայում տեղի ունեցած բախումների հետևանքով հարևան Լիբանան է տեղափոխվել 40 հազար սիրիացի, խիստ չափազանցված տեղեկատվություն է: Այս մասին հայտարարել է Լիբանանի արտգործնախարար Ադնան Մանսուրը՝ նշելով, որ փախստականների իրական թիվը չի գերազանցում 3000-ը:
«Պաշտոնական տվյալներն են՝ 2000-3000, սակայն նրանք մշտական փախստականներ չեն, ժամանակավոր են»,- հայտարարել է Ադնան Մանսուրը: – Այս հարցում այսօր նկատվում է դեպքերի իրական դասավորության վերաբերյալ մեծ ապատեղեկատվություն: Երբեմն խոսում են 20-30 հազար, անգամ 40 հազար փախստականների մասին: Սիրիայից եկող փախստականները նրանք են, որոնց բնակության վայրերում՝ Լիբանանին սահմանակցող շրջաններում, զինված բախումներ են տեղի ունենում»:
Ինչպես հաղորդում է Russia Today-ը, նախարարը նշել է, որ Սիրիայում կայունություն հաստատվելու դեպքում նրանք կվերադառնան: Սիրիայում շատ ընտանիքներ բարեկամներ ունեն Լիբանանում, որոնք էլ հենց կանչել են նրանց:
Նա նաև ավելացրել է, որ իրենց սահմանն անցած բոլոր մաքսանենգները, զինված ավազակները ձերբակալվել են և կդատվեն Լիբանանի օրենքներով:
«Այդ փախստականների դրությունն արմատապես տարբերվում է այն փախստականների դրությունից, որոնք փորձում են մի քանի օր սպասել, ապաստան գտնել զինված բախումներից և խաղաղության վերականգնումից հետո վերադառնալ իրենց տները: Մինչդեռ զինված մարդիկ, որոնք փորձում են անօրինական ճանապարհով զենք տեղափոխել, միանգամայն այլ բան է: Զենքի անօրինական տեղափոխումը Սիրիայից կամ դեպի Սիրիա ստիպում է լիբանանյան պետությանը անհրաժեշտ գործողություններ ձեռնարկել դա կանխելու համար, ինչը և արվում է»,- ասել է Մանսուրը:
Հիշեցնենք, որ մարտի 12-ին Սիրիայում մարդու իրավունքների հնարավոր խախտումների հետաքննության հարցերով հանձնաժողովի ղեկավար Սերժիու Պինեյրուն կոչ էր արել անհապաղ լուծել 25 հազար փախստականների կարգավիճակը:
Ավելի ուշ ՄԱԿ-ի՝ Սիրիայում փախստականների հարցերով վարչության համակարգող Փանոս Մումցիսը հայտարարեց, որ շուրջ 30 հազար սիրիացի ստիպված է եղել փախչել հարևան Հորդանան, Լիբանան, Թուրքիա:
