ИТАР-ТАСС-ի փոխանցմամբ՝ թուրքական իշխանություններն ակնկալում են, որ այս տարի Թուրքիայի կայցելի 4 միլիոն ռուս զբոսաշրջիկ, ինչը կլինի գերմանացի զբոսաշրջիկներից հետո երկրորդ արդյունքը: Այս մասին Մոսկվայում հայտարարել է Թուրքիայի մշակույթի ու զբոսաշրջության նախարար Էրթուղրուլ Գյունայը:
Վերջինիս խոսքերով՝ Ռուսաստանից Թուրքիա ժամանող զբոսաշրջիկներին կհետաքրքրի իրենց նորույթը՝ կրոնական զբոսաշրջությունը. «Մենք առավելագույն ջանքեր ենք գործադրում սպիրտային խմիչքների վրա վերահսկողություն սահմանելու վրա, որի պատճառով նախորդ տարի Բոդրումում թունավորվեցին ռուս զբոսաշրջիկները:
Ներկայիս դրությամբ ռուս զբոսաշրջիկների շրջանում ամենամեծ հանրաճանաչությունը վայելում է Անթալիան, սակայն մենք ցանկանում ենք, որ նրանք այցելեն նաև մեր մշակութային կենտրոններ: Ներկայումս Թուրքիան յուրացնում է կրոնական զբոսաշրջությունը:
Մենք ունենք հետաքրքիր առաջարկներ. Տրապիզոնում գտնվող Սյումելայի հայտնի վանքը, Վանի նահանգի Աղթամարի հայկական եկեղեցին, ինչպես նաև այլ եկեղեցիներ ու մզկիթներ երկրի արևելքում, ինչպես նաև Ստամբուլում Սուրբ Սոֆիան և Սուլթան Ահմեդի մզկիթը:
Թուրքիայում կան 10 վայրեր, որոնք հայտնվել են UNESCO-ի համաշխարհային ժառանգության ցանկում: Եվս 26 վայրեր հավակնում են դրան: Դրանք բոլորը բաց են այցելության համար»:
Նշվում է, որ նախորդ տարի Ռուսաստան են այցելել 200,000 թուրք զբոսաշրջիկներ: Գյունայի մոսկովյան այցի ընթացքում Ռուսաստանն ու Թուրքիան կնքել են նաև զբոսաշրջային ոլորտում համագործակցելու վերաբերյալ համաձայնագիր, որը ռուսական կողմից ստորագրել է «Ռոստուրիզմ»-ի ղեկավար Ալեքսանդր Ռադկովը, իսկ թուրքական կողմից՝ Գյունայի տեղակալ Օզգյուր Օզասլանը:
Հիշեցնենք, որ նախորդ տարեվերջին Գյունայը հայտարարեց, թե հաջորդ տարի զբոսաշրջիկների այցելության ցուցանիշը հասցվելու է 32 միլիոնի, իսկ զբոսաշրջությունից ստացած եկամուտը՝ 27 միլիարդ դոլարի։ Զբոսաշրջիկների քանակով Թուրքիան պետք է աշխարհում զբաղեցնի 5-րդ տեղը։ Իսկ 2023 թվականին (Թուրքիայի Հանրապետության հիմնադրման 100-ամյակ) այդ ցուցանիշները պետք է հասցվեն համապատասխանաբար 50 միլիոն մարդու և 50 միլիարդ դոլարի։
