Երևանի Քանաքեռ-Զեյթուն վարչական շրջանի Բուսաբանական և Գերցենի փողոցի բնակիչները բողոքում են: Այս մասին «Առաջին լրատվական»-ի հետ զրույցում տեղեկացրեց «Թռչնասերների կենտրոն» ՀԿ նախագահ Սիլվա Ադամյանը:
Հիշեցնենք, որ դեռևս 2010 թվականին այդ շենքերի բնակիչներին հայտնի դարձավ, որ նախկին Ալմաստ գործարանի հարևանությամբ անցնող երկաթգիծն այլևս չի գործելու և ըստ տեղեկությունների՝ նախատեսվում է նախկին երկաթգծի տարածքը օգտագործել նոր ավտոտրանսպորտային ճանապարհի անցկացման համար, որը պետք է միացներ Ուլնեցու փողոցը Ռուբինյանց փողոցին: Նշվածը հաստատվել է, երբ ապամոնտաժվել են նախկին երկաթուղային գծերը և կատարվել որոշ հարթեցման աշխատանքներ, իսկ երկաթգծի կայարանը շինաշխատանքների արդյունքում տեղափոխվել է Ռուբինյանց փողոցից դեպի վեր` Ալմաստ գործարանի հետնամաս, որը հնարավորություն կտար կամուրջն օգտագործել, որպես խաչմերուկային հանգույց:
Ի զարմանս, բնակիչների, օրերս աշխատանքներ են սկսվել Բուսաբանական փողոցի սկզբնամասում: Հետաքրքրվելով շինարարներից` նրանց հայտնի է դարձել, որ համաձայն նախագծի, կառուցվող ճանապարհը պետք է շարունակել ոչ թե նախկին երկաթգծի տարածքով դեպի Ռուբինյանց փողոց, այլ շեղելով այն միանալ Բուսաբանական փողոցին` այն օգտագործելով, որպես Ռուբինյանց փողոցին միացնելու հատված: Նորակառույց ճանապարհը երկկողմանի երթևեկելի պետք է լինի: Ըստ բնակիչների` Բուսաբանական փողոցը նեղ փողոց է, լայնությունն ընդամենը 5-6 մետր է և բնականաբար նախատեսված չի եղել որպես բանուկ ավտոճանապարհ` սպասարկելով միայն սեփական տների բնակիչներին, քանզի տների մուտքերը միայն Բուսաբանական փողոցից են: Բնակիչները իրենց տներից դուրս գալով հայտնվելու են բանուկ երթևեկելի նոր ճանապարհին: Այս հանգամանքը բարձրացրել է երկու փողոցների բնակիչների բողոքն ու վրդովմունքը: «Ինչու չօգտագործելով նախատեսված երկաթգծի տարածքը, որոշում է կայացվել փոխել նախագիծը և օգտագործել Բուսաբանական փողոցը` անտեսելով բազում բնակիչների կարծիքը և իրավունքները: Հարցի այս ձևով լուծումը լի է բազում անհարմարություններով»,- նշել են բնակիչները:
Խնդրի կապակցությամբ բնակիչները դիմել են ՀՀ վարչապետին և ՀՀ քաղաքապետին: Մասնավորապես խնդրում են համապատասխան պատկան մարմիններին հանձնարարել անհապաղ դադարեցնել ընթացող շինարարությունը, վերանայել նախագիծը, պարզելով նախկինում հատկացված երկաթգծի տարածքի չօգտագործման պատճառները, ինչպես նաև պարզաբանել, թե արդյոք նշված շինարարությունը ինչքանով է համապատասխանում ներկայիս գործող քաղաքաշինական և ճանապարհաշինական նորմերին:
