Հիմք ընդունելով որոշ լրատվամիջոցների մի շարք հրապարակումներ՝ ոստիկանության անձնագրային և վիզաների վարչությունը գործարար Խաչատուր Սուքիասյանի՝ վերջին 5 տարում բնակության մշտական վայրը պարզելու նկատառումներով լրացուցիչ ուսումնասիրություն է կատարել. արդյունքում պարզվել է, որ նա վերջին 5 տարում 10 ամիս 20 օր ժամկետով Հայաստանում չի բնակվել: «Առաջին լրատվական»-ի հետ զրույցում այս մասին ասաց
ոստիկանության հասարակայնության հետ կապերի վարչության պետ Աշոտ Ահարոնյանը:
«Սուքիասյանի՝ վերջին 5 տարում մշտական բնակության վայրը պարզելու նկատառումով ուսումնասիրություն է կատարվել նաև սահմանային էլեկտրոնային կառավարման տեղեկատվական համակարգում, ինչի արդյունքում պարզվել է, որ նա վերջին 5 տարում 10 ամիս 20 օր ժամկետով Հայաստանում չի բնակվել: Իսկ Ընտրական օրենսգրքի 108-րդ հոդվածի 4-րդ մասի և 115-րդ հոդվածի 2-րդ մասի համաձայն՝ լիազորված պետական մարմինն իր որոշմամբ մերժում է դիմումատուին տեղեկանք տրամադրել, երբ նրա վերաբերյալ տվյալները չեն բավարարում օրենսգրքի 105-րդ հոդվածի պահանջներին՝ վերջին 5 տարում ՀՀ-ում բնակվելը: Այս գրությունն ուղարկվել է Խաչատուր Սուքիասյանին և նաև ԿԸՀ, ինչը նշանակում է, որ ոստիկանության անձնագրային և վիզաների վարչության կողմից Սուքիասյանին 06.03.12-ին տրված տեղեկանքն անվավեր է»,- ասաց Ահարոնյանը:
Նշենք, որ գործարար, Հայ ազգային կոնգրեսի անդամ Խաչատուր Սուքիասյանն իր հերթին դիմում է հղել Կենտրոնական ընտրական հանձնաժողովին, թիվ 10 ընտրատարածքային ընտրական հանձնաժողովին, որում անդրադառնում է ոստիկանության անձնագրերի և վիզային վարչության կողմից ԸԸՀ ներկայացրած գրությանը, ըստ որի` Խաչատուր Սուքիասյանի` վերջին 5 տարում Հայաստանում ապրելու մասին իրենց տված տեղեկանքը չի համապատասխանում իրականությանը:
Նշենք նաև, որ որոշումը կարող է բողոքարկվել ՀՀ վարչական դատարանում՝ օրենքով սահմանված ժամկետում:
