Հայամետ սենատորներ` Նյու Ջերսին ներկայացնող դեմոկրատ Ռոբերտ Մենենդեսի և Իլինոյսը ներկայացնող հանրապետական, ԱՄՆ Կոնգրեսի հայկական հարցերով հանձնախմբի նախկին համանախագահ Մարկ Քըրքի նախաձեռնությունը՝ այս ամիս Հայոց ցեղասպանությունը ճանաչող նոր բանաձևի նախագիծ ներկայացնել ամերիկյան Սենատ, վկայում է, որ Ցեղասպանության ճանաչման ուղղությամբ ԱՄՆ Հայ դատի հանձնախումբն ու ամերիկահայ համայնքը շարունակական լուրջ աշխատանք են իրականացնում: «Առաջին լրատվական»-ի հետ զրույցում նման տեսակետ հայտնեց Վաշինգտոնի Հայ դատի գրասենյակի խոսնակ Էլիզաբեթ Չուլջյանը։
«Երկու սենատորները այս կարևոր բանաձևը կներկայացնեն հաջորդ մի քանի օրերին: Մինչ այդ, բանաձևը սատարողների ցանկն ավելացնելու նպատակով նրանք բանակցում են կոնգրեսական իրենց գործընկերների հետ: Ակնկալում ենք, որ նախաձեռնությանը բազմաթիվ սենատորներ կմիանան»,- ասաց նա:
Չուլջյանի խոսքով՝ նմանօրինակ նախորդ բանաձևը, որը պաշտոնական Անկարայից պահանջում է վերադարձնել բռնագրավված եկեղեցիներն ու եկեղեցապատկան գույքը, և որը ԱՄՆ Սենատ ներկայացվել էր անցած շաբաթ, ևս շատ կարևոր ազդակ է՝ ուղղված Թուրքիային:
Հարցին՝ ինչպիսի՞ հնարավոր արձագանք կարելի է սպասել թուրքական կողմից՝ կապված վերոնշյալ երկու բանաձևերի նախագծերի հետ, Վաշինգտոնի Հայ դատի գրասենյակի խոսնակը նկատեց, որ թուրքական կառավարությունը, ամենայն հավանականությամբ, կակտիվացնի Ցեղասպանության ժխտողականության և կոնկրետ ներկայացվելիք բանաձևի դեմ իր քաղաքականությունը: «Եկեղեցիների վերադարձի վերաբերյալ բանաձևի նախագծի ներկայացման օրը թուրքական կառավարությունը քայլեր ձեռնարկեց՝ ընդլայնելու ամերիկյան PR ընկերությունների հետ իր համագործակցությունը: Այս աշխատանքը նրանց կողմից շարունակական է, ինչպես և շարունակական են ԱՄՆ Հայ դատի հանձնախմբի և հայ համայնքի աշխատանքները»,- ամփոփեց Էլիզաբեթ Չուլջյանը:
Նշենք, որ հայամետ սենատորներ` Նյու Ջերսին ներկայացնող դեմոկրատ Ռոբերտ Մենենդեսը և Իլինոյսը ներկայացնող հանրապետական, ԱՄՆ Կոնգրեսի հայկական հարցերով հանձնախմբի նախկին համանախագահ Մարկ Քըրքը պատրաստվում են այս ամիս Հայոց ցեղասպանությունը ճանաչող նոր բանաձևի նախագիծ ներկայացնել ամերիկյան Սենատում։
Երկու սենատորները օրինագիծը հովանավորելու կոչով դիմել են իրենց գործընկերներին։
Նախագիծը նման է երկու տարի առաջ Ներկայացուցիչների պալատի Արտաքին հարաբերությունների հանձնաժողովի հավանությանն արժանացած տարբերակին, սակայն ավելացված է Ցեղասպանության հանցագործության կանխման և պատժման վերաբերյալ կոնվենցիայի հարցով 1951 թվականին Արդարադատության միջազգային դատարան ԱՄՆ-ի ներկայացրած հայցից մի կարևոր մեջբերում, ըստ որի` «քրիստոնյաների հետապնդումը հռոմեացիների կողմից, հայերի ջարդերը թուրքերի կողմից, նացիստների կողմից միլիոնավոր հրեաների և լեհերի բնաջնջումը ցեղասպանության հանցագործության ակնառու օրինակներ են»։
