Իրանական Mehr News լրատվական գործակալության փոխանցմամբ՝ Իրանի խորհրդարանի նախագահ Ալի Լարիջանին այսօր տեղի ունեցած խորհրդարանական նիստի ժամանակ հայտարարել է, որ ԱՄՆ-ն և Իսրայելը կրակի հետ են խաղում տարածաշրջանում.
«Վերջին օրերին մենք ականատես եղանք Աֆղանստանում և Պաղեստինում խաղաղ բնակչության նկատմամբ ԱՄՆ-ի և Իսրայելի իրականացրած մի շարք գազանություններին: Նրանք նախաձեռնել են անմարդկային գործողություններ՝ ուղղված տասնյակ երեխաների ու տարեցների սպանությանը, բնակելի շինությունների զանգվածային ավերմանը:
Նմանատիպ իրավիճակը նման է կրակի հետ խաղալուն: Այդպիսի գործողությունները չեն կարող անպատիժ մնալ և ներվել: Միլիոնավոր մուսուլմաններ ապշած են խաղաղ բնակչության սպանությունից և Ղուրանի այրումից: Իրանը կտրուկ դատապարտում է այդ գործողությունները:
ԱՄՆ-ը ժողովրդավարական կարգախոսների պատրվակով օկուպացրել է Աֆղանստանը: Ի՞նչ է տվել Աֆղանստանի ժողովրդին այդ «ժողովրդավարությունը»՝ բացի ավերումից, սպանություններից, ամերիկյան բազաներից ու ճամբարներից:
ԱՄՆ-ը պետք է իրեն հաշիվ տա, որ հեռու չէ այն օրը, երբ ինքը լքելու է Աֆղանստանի տարածքը: Իսրայելը նույնպես ստիպված կլինի տարածաշրջանում իսլամական զարթոնքի ճնշման տակ ազատել Պաղեստինում օկուպացրած տարածքները»:
Հիշեցնենք, որ վերջին շրջանում Աֆղանստանում այրել էին Ղուրանը, ամերիկացի մի զինծառայող Կանդահար նահանգում սպանել էր 16 խաղաղ բնակչի, իսկ Գազայի հատվածում Իսրայելի ռմբակոծությունների հետևանքով զոհվել է 25 մարդ:
