Մարտի 5-ին Քաջարանի գյուղապետ Ռաֆիկ Աթայանը բաց նամակով դիմել էր ՀՀ նախագահին` 2011 թ. ապրիլի 28-ի N 627-Ն որոշումն անվավեր ճանաչելու պահանջով: Նրա բաց նամակը դեռևս մնացել է անպատասխան: Այս մասին «Առաջին լրատվական»-ի հետ զրույցում տեղեկացրեց Քաջարանի գյուղապետ Ռաֆիկ Աթայանը`խոսելով իր հետագա անելիքների ու սպասելիքների շուրջ:
Նա նշեց՝ քանի որ նախագահը համարվում է երկրի ամենաբարձր պաշտոնատար անձը, իր բոլոր հույսերը կապում է նրա հետ և սպասում է պատասխանին: «Ես մեր բոլոր հույսերը կապում եմ երկրի նախագահի հետ, հուսով եմ դեռ, որ արձագանքելու է, բայց եթե նույնիսկ ոչ մի արձագանք չլինի, մենք հող տվող չենք»,- նշեց Ռ. Աթայանը`հավելելով, որ իրենց փորձում են ստիպել թողնել իրենց պապերի հայրենիքը, հողը, ջուրը: Նա ցավով ասաց. «Ո՞վ կթողի իր մայրիկի գերեզմանը քանդեն: Որևէ մեկը երբեք նման բան չի անի, ես նույնպես: Թող փորձ անեն մոտենալ մեր գյուղին և մեր պապերի գերեզմաններին»:
Ըստ Ռ. Աթայանի` ամբողջ գյուղն է պատրաստ պայքարելու իրենց ընտանիքների, անցյալի համար: Նրա խոսքով` պահանջը շարունակում է մնալ նույնը` անվավեր ճանաչել N 627-Ն որոշումը, այլապես գյուղացիները պայքարելու են և չեն հանձնելու ոչ մի կտոր հող:
Անդրադառնալով ՀՀ վարչապետի այն հայտարարությանը, թե հարցը պետք է լուծել երկխոսության ճանապարհով` հօգուտ գյուղացիների, ասաց, որ այս հայտարարությունից հետո ոչ մի փոփոխություն չի եղել:
Հիշեցնենք, որ ՀՀ կառավարության 2011 թվականի ապրիլի 28-ի N 627-Ն որոշման համաձայն` ՀՀ Սյունիքի մարզի Քաջարանի, Արծվանիկի, Սևաքարի, Աճանանի, Չափնիի և Սյունիքի համայնքների վարչական սահմաններում որոշ տարածքներ ճանաչվել են բացառիկ գերակա հանրային շահ և հողերի նպատակային նշանակությունը փոփոխվելու է: Որոշումը կայացվել է` հաշվի առնելով Սյունիքի մարզի Քաջարանի պղնձամոլիբդենային հանքավայրի շահագործման ծրագիրը: Այսինքն` տվյալ հողերը պետք է օգտագործվեն հանքավայրի ընդլայնման նպատակով: Արդեն մի քանի ամիս է որոշմանը իրենց անհամաձայնությունն են հայտնում Քաջարան գյուղի բնակիչները, մասնավորապես գյուղապետը: Բնապահպանական քաղաքացիական նախաձեռնությունների ակտիվիստները, բնապահպանները, ԱԺ պատգամավորները մի քանի անգամ եղել են գյուղում և ծանոթացել խնդրին, պայքարել, սակայն հարցը մնում է չլուծված:
