«Որակական փոփոխություն է տեղի ունեցել կադաստրում։ Մեր քաղաքացիները նույնիսկ չեն հավատում, որ այդ որակի ծառայություն այսօր հնարավոր է Հայաստանի Հանրապետությունում` լավագույն ստանդարտներին համապատասխան»,- այսօր կառավարության նիստում հայտարարեց վարչապետ Տիգրան Սարգսյանը՝ հավելելով, որ մոտակա ամիսների ընթացքում դրական արձագանքներ կստանան քաղաքացիներից, որովհետև նրանք սկսում են օգտվել այդ ծառայությունից։
Վերաբաշխելով 2012 թ. պետբյուջեն, փոփոխելով իր նախկին որոշումներից մեկը, կառավարությունը կադաստրի պետական կոմիտեին հատկացրել է 219 մլն 491 հազար 900 դրամ` գույքի նկատմամբ իրավունքների և սահմանափակումների պետական գրանցման համար պահանջվող փաստաթղթաշրջանառությունն էլեկտրոնային եղանակով (առցանց) իրականացնելու համար ձեռք բերված սերվերի դիմաց վճարումն իրականացնելու նպատակով։
Ըստ վարչապետի՝ տարեկան շուրջ 400 հազար քաղաքացի է շփվելու կադաստրի հետ. «Մենք վերջապես ունենք ներդրված էլեկտրոնային համակարգ, էլեկտրոնային հաշվառում, թափանցիկ վերահսկողություն, և սա կարող ենք համարել մեր հաջողված ծրագրերից մեկը»։
Կառավարությունը նիստում հավանություն է տվել ՀՀ աղետների ռիսկերի նվազեցման ազգային ռազմավարությանը։ Հայաստանը դեռ 2005 թ. միացել է Աղետները դիմակայելու ունակությունների զարգացման Հյոգոյի 2005-2015 թթ. գործողությունների ծրագրին և նախանշված գործառույթների իրագործմանն է միտված այս ռազմավարությունը։ Մեկ այլ որոշմամբ կառավարությունը ՀՀ մարզպետներին հանձնարարել և տեղական ինքնակառավարման մարմիններին առաջարկել է մարզերի և բնակավայրերի (համայնքների) զարգացման ծրագրեր ներառել սեյսմիկ ռիսկի նվազեցման միջոցառումները։
«Անհրաժեշտ է ներգրավել մասնավոր հատվածը, և համագործակցելով քաղաքաշինության նախարարության հետ` ներկայացնել այն ծրագրերը, որոնք բիզնեսի համար շահավետ են։ Այդ դեպքում մեր ծրագիրն ավելի մեծ ծավալ կստանա», – հավելել է Տ. Սարգսյանը։
«Երկրաշարժի հետևանքով անօթևան մնացած ընտանիքների բնակարանային ապահովում ՌԴ կողմից ՀՀ-ին տրամադրված վարկային միջոցների հաշվին» ծախսային ծրագրի իրականացման կազմակերպչական ծախսերի ֆինանսավորման նպատակով գործադիրը ՀՀ քաղաքաշինության նախարարությանը հատկացրել է 21 մլն 133 հազար 600 դրամ։
