Հանրային ու մասնավոր հեռուստաընկերություններն արդեն սահմանել են մայիսի 6-ին կայանալիք խորհրդարանական ընտրությունների քարոզարշավի ընթացքում քաղաքական գովազդի սակագները, հայտնում է «Ազատություն» ռադիոկայանը:
Ապրիլի 8-ից մեկնարկող քարոզարշավի ընթացքում ամենաթանկ գինը սահմանել է «Շանթ» հեռուստաընկերությունը. քաղաքական գովազդի 1 րոպեն այս հեռուստաընկերությունում արժե 120 հազար դրամ: Նկատենք, որ 2007 թվականի խորհրդարանական ընտրություններում «Շանթ»-ի քաղաքական գովազդի 1 րոպեն արժեր 108 հազար դրամ:
Երկրորդ տեղում «Արմենիա» հեռուստաընկերությունն է: Քաղաքական գովազդի 1 րոպեն այս հեռուստաընկերությունում արժե 110 հազար դրամ: 2007 թվականի խորհրդարանական ընտրությունների ժամանակ այն կազմում էր 130 հազար դրամ:
Երրորդ տեղում Հանրային հեռուստաընկերությունն է: Այստեղ քաղաքական գովազդի 1 րոպեն կարժենա 80 հազար դրամ: Նշենք, որ 2007-ի համեմատությամբ Հանրային հեռուստաընկերության սակագները մնացել են անփոփոխ:
2007-ի համեմատ կտրուկ նվազել է «Երկիր Մեդիա» հեռուստաընկերության քաղաքական գովազդի սակագինը: 100 հազար դրամի փոխարեն այս տարվա նախընտրական շրջանում 1 րոպե քաղաքական գովազդը կարժենա 36 հազար դրամ:
«Երկիր Մեդիայից» բացի նվազել է նաև «Կենտրոն» հեռուստաընկերության քաղաքական գովազդի սակագինը: Եթե 2007-ի խորհրդարանական ընտրությունների ժամանակ այն արժեր 108 հազար դրամ, ապա այս քարոզարշավի ընթացքում 1 րոպեն կարժենա մոտ 32 հազար դրամ:
Դե իսկ ամենացածր սակագինը սահմանել է «Արմնյուզ» հեռուստաընկերությունը. 1 րոպե քաղաքական գովազդն այստեղ 18 հազար դրամ արժե:
Նշենք, որ համաձայն նոր Ընտրական օրենսգրքի՝ վճարովի եթերաժամի 1 րոպեի գինը չի կարող գերազանցել մինչև ընտրությունների նշանակումը վերջին 6 ամսվա համար առևտրային գովազդի միջին գինը և մինչև նախընտրական քարոզչության ավարտը այն չի կարող փոփոխվել:
