Թիվ 44113309 քրեական գործով մեղադրյալ Արթուր Գառնիկի Զադոյանը բաց նամակ է գրել ՀՀ նախագահ Սերժ Սարգսյանին, որն էլ ստորև ներկայացնում ենք.
«Մեծարգո նախագահ, սույն դիմումով խնդրում եմ Ձեզ, որպեսզի հերթական անգամ այս դիմումը չանտեսվի և, ի վերջո, ստանա իր դրական լուծումը:
2010թ. ապրիլի 08-ին ինձ մեղադրանք է առաջադրվել այն արարքի համար, ես դիտավորությամբ ՀՀ ԱԺ պատգամավոր, Արարատի մարզի Շահումյան գյուղի բնակիչ, «Բարգավաճ Հայաստան» կուսակցության անդամ Կարո Կարապետյանի առողջությանը պատճառել եմ միջին ծանրության վնաս` առողջության տևական քայքայումով:
Քրեական գործով նախաքննության օրինականության նկատմամբ հսկողություն և դատավարական ղեկավարում իրականացնող ՀՀ Գլխավոր դատախազության ավագ դատախազ Հ. Հարությունյանի կողմից դեռևս 2010թ. մայիսի 12-ից գրություն է հասցեագրվել ինձ` հետևյալ բովանդակությամբ «… ՀՀ քրեական օրենսգրքի 113-րդ հոդվածի 1-ին մասով Ձեզ մեղադրանք է առաջադրվել գործով ձեռք բերված ապացույցների հիման վրա, Ձեր և մյուսների արարքներին վերջնական քրեաիրավական գնահատական կարող է տրվել անհրաժեշտ առերեսումներ ու այլ դատավարական գործողություններ կատարելուց հետո միայն, որը հնարավոր չէ` Ձեր ծանր հիվանդության պատճառով»:
Մեծարգո նախագահ, նշեմ, որ ես որևէ ծանր հիվանդությամբ չեմ տառապում, այլ դեպքի օրը ստացած հրազենային վնասվածքների հետևանքով, ըստ դատաբժշկական եզրակացության, իմ առողջությանը, պարզապես, պատճառվել է կյանքին վտանգ սպառնացող ծանր վնաս:
Այս դեպքի և տիրող անօրինական իրավիճակի վերաբերյալ ես արդեն իմ դիմումով իրազեկել եմ ինչպես Ձեզ, այնպես էլ համապատասխան մարմիններին` ԱԺ նախագահին և ՀՀ գլխավոր դատախազին, սակայն մինչ օրս որևէ առաջխաղացում տեղի չի ունեցել, մասնավորապես, մինչ օրս քրեական գործի անհիմն կասեցումը չի վերսկսվել և ԲՀԿ անդամ Կարո Կարապետյանին մեղադրանք չի առաջադրվել, այն պարզ պատճառով, որ վերջինս օգտվում է ԱԺ պատգամավորին վերապահված «անձեռնմխելիության» իրավունքից:
Համոզված եմ, որ վերը նշված քրեական գործի շրջանակներում ձեռք բերված ապացույցներն արդեն իսկ բավարար և հիմնավոր են ԲՀԿ անդամ Կարո Կարապետյանին` սպանության փորձ կատարելու հանցագործության հատկանիշներով, մեղադրանք առաջադրելու համար:
Մինչդեռ, քրեական գործով ձեռք բերված ապացույցներով ինձ է մեղադրանք առաջադրվել այն արարքի համար, որ ես ՀՀ ԱԺ պատգամավոր, Արարատ մարզի Շահումյանի գյուղի բնակիչ Կարո Կարապետյանի համար անձնական օգտագործման ավտոմեքենա ձեռք բերելու նպատակով 2009թ. հոկտեմբերի 5-ին` ժամը 11:00-ի սահմաններում, վարորդ Օնիկ Հովհաննիսյանի հետ Երասխ-Երևան մայրուղով մեկնել ենք Էջմիածին քաղաք: Զրույցի ընթացքում Կարո Կարապետյանից տեղեկացել եմ, որ Կարո Կարապետյանը մեքենա գնելու համար գումար չի վերցրել և ցանկանում է առանց գումար վճարելու ստանալու այն, ուստի հրաժարվել եմ շարունակել ճանապարհը և պահանջել կանգնեցնել ավտոմեքենան:
Վարորդի կողքին նստած Կարո Կարապետյանը վրդովված հայհոյանքներ է տվել իմ հասցեին և բռունցքով հարվածել գլխիս: Դրանից հետո մեքենայի մեջ գտնվող մետաղյա գործիքով երկու անգամ հարվածել եմ Կարո Կարապետյանի գլխին` դիտավորությամբ նրա առողջությանը պատճառել միջին ծանրության վնաս` առողջության տևական քայքայումով: Մարմարաշեն գյուղի հատվածում ավտոմեքենան կանգ է առել:
Օգտվելով դրանից` ես դիմել եմ փախուստի: Ընթացքում Կարո Կարապետյանը
«Բրաունինգ» տեսակի 9մմ տրամաչափի ատրճանակից հինգ անգամ կրակել է իմ ուղղությամբ: Գնդակներից մեկը դիպել է իմ աջ բազկին, իսկ մյուսը` աջ ազդրին:
Նախաքննության մարմնին ուղղված բազմաթիվ բողոքներով խնդրել եմ, որպեսզի պատասխանատվության ենթարկվի ԲՀԿ անդամ Կարո Կարապետյանը և ինձ տրվի տուժողի կարգավիճակ, սակայն վարույթն իրականացնող մարմինը, վարույթի նկատմամբ հսկողություն իրականացնող դատախազը և անգամ դատարաններն անտեսելով օրենքների իմպերատիվ պահանջները շարունակում են հովանավորել ԲՀԿ անդամ Կարո Կարապետյանին` կասեցումից հետո վերսկսման որևէ նախադրյալ չձեռնարկելով: Որպես լոզունգ որդեգրել են ընդհամենը հետևյալ պատճառաբանությունը. «քրեական գործի վերջնական ընթացքը լուծելու, գործի համար նշանակություն ունեցող տվյալները` կիսագուլպայի մեջ դրված ատրճանակով շուրջ 5-10 մետր վազելու հնարավորությունը ստուգելու և ճշտելու նպատակով անհրաժեշտ է Ձեր մասնակցությամբ կատարել քննչական փորձարարություն, ինչին խանգարում է Ձեր բազմաթիվ անգամ վիրահատվելը, ոտքի վիրակապված լինելու հանգամանքը, որպեսզի հանգամանքն էլ բացառում է Ձեր մասնակցությամբ անհրաժեշտ քննչական գործողությունը կատարելուն»:
Հարգարժան դատախազ Հ. Հարությունյանը նշելով այս անհիմն պատճառաբանությունը, իսկ դատարանն էլ հաստատելով այն, խախտում են օրենքը, համաձայն որի` արգելվում է անձին ներգրավել երկարաժամկետ կամ ֆիզիկական տանջանքներ պատճառող, նրա կամ շրջապատողների առողջության համար վտանգ ներկայացնող քննչական փորձարարությունների, դատավարական այլ գործողություններ կատարելուն:
Առավել ևս, որ օրենսդիրը չի նախատեսում, որ քննչական փորձարարությանը պարտադիր պետք է մասնակից լինի մեղադրյալը: Հնարավոր բոլոր ապացույցներն արդեն իսկ բավարար են ԱԺ պատգամավոր Կարո Կարապետյանին մեղադրանք առաջադրելու համար, ուստի խնդրում եմ
1. Կանխել ՀՀ Հատուկ քննչական ծառայությունում տիրող անօրինականությունները` կոչ անելով պահպանել օրենքի պահանջը` տառացիորեն
2. ԱԺ նախագահին հասու դարձնել իր պատգամավորի կողմից կարատված հանրորեն վտանգավոր արաք կատարելու մասին
3. Միջոցներ ձեռնարկել, որպեսզի ՀՀ գլխավոր դատախազը համապատասխան միջնորդություն ներկայացնի ԱԺ` պատգամավոր Կարո Կարապետյանին ձերբակալելու թույլտվություն ստանալու ուղղությամբ:
