«Այս տարի արդեն գրանցվել է թունավորման 16 դեպք, որից 6-ը՝ խիստ ծանր: Այս ցուցանիշը անցյալ տարիների համեմատ բարձր է. 2010 թ. ամբողջ հունվար ամսին ունեցել ենք թունավորման 41, իսկ 2009 թ.` 38 դեպք»,- այսօր մամլո ասուլիսի ժամանակ հայտնեց «Սուր թունավորումների բաժանմունքի» տնօրեն, Հայաստանի գլխավոր թունաբան Միքայել Գաբրիելյանը: Թունաբանի հաղորդմամբ, այս տարվա թունավորումների մեջ, ինչպես ամեն տարի, մեծ մաս են կազմում դեղորայքային թունավորումները. գրանցված 16 դեպքից 4-5-ը դեղորայքային թունավորումներ են: «Այս թունավորումները հիմնականում ինքնասպանության փորձի արդյունք են, և, ցավոք, նման թունավորում ստացածներին երբեմն չի հաջողվում փրկել»,- ասում է Մ. Գաբրիելյանը և հավելում, որ 2010 թ. դեղորայքային թունավորում ստացած 112 դեպքից 21-ը ունեցել են մահվան ելք: «Սուր թունավորումների բաժանմունքում» մեծ թիվ են կազմում նաև սնկային թունավորում ստացած հիվանդները: Միայն անցյալ տարի սնկային թունավորմամբ 78 հոգի է դիմել, որոնց մեծ մասը Կոտայքի մարզից: Թունավորումներից խուսափելու համար Գաբրիելյանը խորհուրդ է տալիս որակյալ սնունդ օգտագործել և չչարաշահել ալկոհոլը:
