Աշխարհում ամենաթանկ ոսկեդրամը` 1933թ. ամերիկյան «կրկնակի արծիվը», առաջին անգամ ցուցադրվել է Լոնդոնի «Գոլդսմիտ հոլում»: Սա մետաղադրամի առաջին ցուցադրությունն է Եվրոպայում: Այն 2002թ. Sotheby’s աճուրդի տան կողմից վաճառվել էր ավելի քան 7.5 մլն դոլարով:
1933թ. հատվել էր ընդամենը 445.5 հազար այդպիսի դրամ, սակայն տնտեսական ճգնաժամի` Մեծ դեպրեսիայի ժամանակ ԱՄՆ-ը հրաժարվեց ոսկեդրամների ստանդարտից:
Դեռ Թեդոր Ռուզվելտի կողմից 20-րդ դարասկզբին նախաձեռնած մետաղադրամները այդպես էլ շրջանառության մեջ չմտան ու նորից ձուլվեցին: Աշխարհում պահպանվեցին երկու տասնյակից պակաս ոսկե «կրկնակի արծիվներ»: Դրանցից միայն մեկն է գտնվում մասնավոր հավաքորդի մոտ, մյուսները համարվում են ԱՄՆ գանձարանի սեփականությունը:
20-ից ոչ ավելի ոսկեդրամներ այդուհանդերձ «փրկվեցին» գողության հետևանքով: Դրանք ձեռք բերեց ոսկերիչ Իսրայել Սվիտը, որոնց մեծ մասը հետագայում վաճառեց մասնավոր անձանց: Մեկը գնեց Եգիպտոսի թագավոր Ֆարուկ 1-ինը (1920-1965թթ.): Հեղափոխության ժամանակ ամերիկյան հատուկ ծառայության աշխատակիցները առգրավել էին ոսկեդրամները: Դրանցից մեկը 1991թ. բաժին ընկավ բրիտանացի Սթիվեն Ֆենտոնին, ումից էլ հատուկ ծառայության աշխատակիցներն այն հետագայում բռնագանձեցին:
Դատական երկար քաշքշուկից հետո դատարանը վճռեց ոսկեդրամը վաճառել աճուրդում, իսկ գոյացած գումարը կիսել ԱՄՆ գանձարանի ու Ֆենտոնի միջև, ինչի հետևանքով էլ 2002թ. ոսկեդրամը հայտնվեց անհայտ հավաքորդի մոտ, որը դրա համար վճարեց 7.59 մլն դոլար:
Չնայած «կրկնակի արծիվներ» անվանմանը, դրամի վրա առկա է միայն մեկ արծիվ ու դրա արժեքը 20 դոլար էր:
Դրամը կցուցադրվի միայն երկու օր` այսօր և վաղը:
