ՀՀ ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Արտակ Դավթյանը փետրվարի 28-ին հանդիպել է Եվրոպական ուսանողական միության ներկայացուցիչների` Լեհաստանի ուսանողական ազգային միությունների զարգացման հանձնաժողովի ներկայացուցիչ Մարեկ Բարանսկու, Ռումինիայի ուսանողական ազգային միության նախագահ Դանիելա Ալեքսեի և Ֆինլանդիայի ուսանողական ասոցիացիայի միջազգային հարաբերությունների հանձնաժողովի նախագահ Յուրի Սալենեի հետ: Հանդիպմանը ներկա է եղել նաև Հայաստանի ուսանողական ազգային ասոցիացիայի միջազգային հարաբերությունների հանձնաժողովի նախագահ Սարգիս Ասատրյանցը:
ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին տեղեկացնում են, որ հյուրերը Հայաստան են այցելել` ուսումնասիրելու Հայաստանի կրթական համակարգը, պարզելու բուհերի կառավարման գործընթացին ուսանողների ներգրավվածության աստիճանը, նրանց խնդիրները, Եվրոպական ուսանողական միության չափորոշիչներին Հայաստանի կրթական համակարգի համապատասխանության աստիճանը:
Եվրոպական ուսանողական միությանը անդամակցում է 35 երկիր, ունի 45 ներկայացուցիչ: Յուրաքանչյուր երկիր միության կազմում կարող է ունենալ 2 անդամ: Կառույցին անդամակցում են նաև Վրաստանը և Ադրբեջանը:
Հյուրերն իրազեկել են, որ դեռ 2008 թվականին Հայաստանի ուսանողական ազգային ասոցիացիան անդամակցության խնդրանքով դիմել է Եվրոպական ուսանողական միությանը, ինչը, սակայն, մերժվել է, քանի որ, ըստ իրականացված ուսումնասիրությունների` առկա են եղել որոշակի խնդիրներ:
Արտակ Դավթյանը նշել է, որ իր ղեկավարած հանձնաժողովը զբաղվում է նաև երիտասարդությանը և կրթությանը վերաբերող հարցերով:
Ա. Դավթյանը նշել է, որ կրթության ոլորտում իրականացվել են մի շարք օրենսդրական բարեփոխումներ` բարձրագույն կրթության բնագավառում կատարված փոփոխությունների առանցքում Բոլոնյան գործընթացն է, որը ենթադրում է ուսանողների և դասախոսների ազատ տեղաշարժ: Բացի այդ`գործնականում ներդրվել է կրեդիտային համակարգը, իսկ բուհերի կառավարման խորհուրդների 25 տոկոսը ուսանողներ են, ովքեր մասնակցում են կարևոր հարցերի քննարկմանը:
Ա. Դավթյանը հյուրերին տեղեկացրել է, որ հանձնաժողովին կից գործում է Երիտասարդական խորհրդարան:
Հանձնաժողովի նախագահը պատրաստակամություն է հայտնել հնարավորինս աջակցել Հայաստանի ուսանողական ազգային ասոցիացիային` անդամակցելու Եվրոպական ուսանողական միությանը:
