100 տոկոսանոց համամասնական ընտրակարգի անցնելու խնդիրը այն եզակի հարցերից մեկն է, որը միավորեց ամբողջ ընդդիմությանը, դրան համաձայնել են նաև իշխանության ներկայացուցիչներ: Այսօր ԱԺ-ում նման հայտարարություն արեց «Ժառանգության» պատգամավոր Արմեն Մարտիրոսյանը՝ ներկայացնելով ՀՅԴ և «Ժառանգություն» խմբակցությունների առաջարկած և հրատապ համարված «ՀՀ ընտրական օրենսգրքում փոփոխություններ կատարելու մասին» օրինագիծը:
«Ունենք այնպիսի իրավիճակ, որ կա կոնսենսուս-1: ՀՀԿ-ն դեմ է արտահայտվել: Չկա իրավական խնդիր՝ խնդիրը բացառապես քաղաքական է»,- հայտարարեց Ա. Մարտիրոսյանը:
Պատգամավորը հիշեցրեց Սերժ Սարգսյանի ամանորյա ելույթը, որում նա նշել էր, թե արդար ընտրություններ անցկացվելու համար ինքը օգնության կարիք ունի: «Այդ ձեռքը մենք մեկնել ենք և առաջարկում ենք 100 տոկոսանոց համամասնականի անցնելու ընտրակարգը»,- նշեց Ա. Մարտիրոսյանը:
Նա նաև նշեց, որ Սերժ Սարգսյանը հայտարարել է, թե ՀՀԿ-ն իր ցուցակում չի ընդգրկելու գործարարների, որոնք կարող են առաջադրվել մեծամասնականով, և նրանք արդեն աշխատում են այդ ուղղությամբ: Դիմելով իշխանություններին՝ «Ժառանգության» պատգամավորը կոչ արեց՝ եթե ցանկանում են վերջին 20 տարվա մեջ արդար ընտրություն անցկացնել, պետք է ընդունեն 100 տոկոսանոց համամասնականի անցնելու առաջարկը և առաջացած այս խորը վիհը լցնեն այս օրինագծով: Օրինագծին աջակցում են արտախորհրդարանական ՀԱԿ-ը, «Ազատ դեմոկրատները» և բազմաթիվ այլ կուսակցություններ:
«Սա մեզ կտա պետական կառավարման համակարգի առողջացում և այնպիսի բարեփոխումներ, որոնց մասին տարիներ շարունակ խոսում է իշխանությունը, բայց դեռ որևէ քայլով առաջ չի շարժվում: Մենք չենք ասում, որ մեծամասնականը վատ է, և համամասնականը միակ ճիշտ ճանապարհն է: Մենք ասում ենք՝ մեծամասնական ընտրական համակարգը, ըստ էության, դառնալու է ֆեոդալական համակարգ, և այստեղ աշխատում է իշխանության դաբրոյով անցնելու մեթոդը»,- հայտարարեց Ա. Մարտիրոսյանը՝ հավելելով, որ Վենետիկի հանձնաժողովը տվել է եզրակացություն, ըստ որի՝ օրինագիծը չի հակասում ժողովրդավարական չափանիշներին:
