Լեոնարդո դա Վինչիի հանրահայտ Մոնա Լիզա կտավի հետևում պատկերված է ոչ թե աբստրակտ պատկեր, այլ կոնկրետ բնապատկեր` հյուսիսիտալական Բոբբիո քաղաքի մերձակայքը,- պնդում է հետազոտող Կարլա Գլորին, որի փաստարկները երկուշաբթի օրը հրապարակել է The Daily Telegraph թերթը:
Այսպիսի ենթադրություններ Գլորին արել է այն բանից հետո, երբ լրագրող, գրող, Կարավաջիոյի գերեզմանն առաջինը հայտնաբերող և մշակութային ժառանգության պահպանության իտալական ազգային կոմիտեի նախագահ Սիլվանո Վինչետին նրան հայտնել է, որ Լեոնարդոյի կտավի վրա հայտնաբերել է առեղծվածային թվեր և տառեր: Մասնավորապես, կամրջի կամարի տակ, Ջոկոնդայի ձախ թևի հետևում (այսինքն` նկարը նայողի համար աջ կողմում) հայտնաբերվել է 72 թիվը: Ինպես հայտնում է РИА Новости գործակալությունը, ինքը՝ Վինչետին, կարծում է, որ դա Լեոնարդոյի ինչ-որ միստիկական տեսության հղում է:
Գլորիի կարծիքով, այն մատնանշում է 1472 թվականը, երբ Բոբբիոյի կողքով անցնող Տրեբիյա գետը դուրս է եկել ափերից և ավերել կամուրջը՝ ստիպելով այդ շրջաններում իշխող Վիսկոնտի ընտանիքին կառուցել նորը: Մնացածը նա համարում է ուղղակի բնապատկեր, որը բացվում էր տեղի բերդի պատուհաններից:
Ավելի վաղ Բոբբիոն հայտնի է դարձել որպես մի վայր, որտեղ տեղակայված է Սան Կոլոմբանո տաճարը, որը նախատիպ է հանդիսացել Ումբերտո Էկոյի «Վարդի անուն»-ի համար:
Իր փաստարկներում Կարլա Գլորին ավելի է հեռուն գնում. եթե գործողությունների վայրը ոչ թե Իտալիայի կենտրոնն է, ինչպես գիտնականներն էին վստահեցնում մինչև այդ՝ ելնելով նրանից, որ Լեոնարդոն կտավի վրա աշխատանքներն սկսել է 1503-1504 թթ. Ֆլորենցիայում, այլ` հյուսիսը, նշանակում է, որ նրա մոդելը ոչ թե Լիզա դել Ջոկոնդան է, այլ Միլանի դքսի դուստր Բիանկա Ջովաննա Սֆորցան:
Նրա հայրը՝ Լոդովիկո Սֆորցան, Լեոնարդոյի գլխավոր պատվիրատուներից էր և հայտնի մեկենաս:
Գլորին կարծում է, որ նկարիչ գյուտարարը բնակվել է ոչ միայն իր տանը Միլանում, այլև Բոբբիոյում, մի քաղաք, որը այն ժամանակներում հայտնի էր իր գրադարանով, որը նույնպես պատկանում էր միլանցի կառավարիչներին:
Ճիշտ է, թերահավատորեն տրամադրված մասնագետները պնդում են, որ Վինչենտիի կողմից Մոնա Լիզայի բիբերում հայտնաբերված և՛ թվերը, և՛ տառերը ընդամենը ճաքեր են, որոնք առաջացել են դարերի ընթացքում: