Շիրակի փոխմարզպետ Սեյրան Պետրոսյանը միանշանակ հերքեց Գյումրիում երեկ արձանագրված հացի 10-20 դրամով թանկացումը: «Այդպիսի բան Գյումրիում արձանագրված չի»,- ի պատասխան «Առաջին լրատվական»-ի հարցին՝ ինչպե՞ս կմեկնաբանի հացի թանկացումը, հայտարարեց Ս. Պետրոսյանը:
Փոխմարզպետի այս կտրուկ հայտարարությունը պարզապես կարելի է «զարմանալի» անվանել, քանի որ բազմաթիվ գյումրեցիներ հաստատում են հացի թանկացումը և բողոքում դրանից: Մասնավորապես, «ԳԱԼԱ» հեռուստաընկերության համաձայն՝ 110 կամ 120 դրամով վաճառվող հացն արդեն արժե 130 և 140 դրամ: «Խանութներում սա բացատրում են նրանով, որ իրենց դեռ երեկվանից զգուշացրել էին, որ ալյուրի գնի բարձրացմամբ պայմանավորված հացը ավելի թանկ են հանձնելու խանութներին: Ալյուրի գնի բարձրացում իսկապես կա. 50 կգ-ոց 1 պարկ ալյուրի գինը բարձրացել է 600-700 դրամով»,- նշում է հեռուստաընկերությունը՝ հավելելով, որ ալյուրի թանկացման վերաբերյալ պարզաբանումներ դեռ չկան:
Նկատենք, որ անցած տարի աշխարհում ցորենի պակասություն չի զգացվել, և այս տարի էլ առատ բերք է սպասվում, այդ թվում՝ նաև մեր հանրապետությունում, և միջազգային տարբեր կառույցներ հացահատիկի շուկայում գնանկում են կանխատեսել:
