Արխիվների քննության արդյունքում դատական գործեր են հարուցվել

Պետական հիմնարկների ղեկավարությունը ստանձնում են նոր պետեր և իբր փորձելով ուղղել իրենց նախորդների կատարած անօրինությունները` գործում օրենքի նոր խախտումներ: Այսպես` քննության ենթարկելով Արտաշատի հարկային տեսչության արխիվները` նոր ղեկավարությունը հայտնաբերել է հարկային պարտավորությունը չիրականացնելու բազում դեպքեր և դատական գործեր հարուցել: Նման գործ է հարուցվել նաև Արտաշատ քաղաքի մի բնակչի դեմ: Քաղաքացին չցանկացավ հրապարակել իր անունը, սակայն համաձայնեց գործից որոշ մանրամասներ պատմել: Իր դեմ հարուցված դատական գործի մասին նա տեղեկացել է` ստանալով դեկտեմբերի 21-ին դատի ներկայանալու մասին ծանուցագիր: Հարկային տեսչությունը պահանջում է քաղաքացուց 200,228 դրամ բռնագանձել` 3 տարի առաջ ունեցած պարտավորությունները չկատարելու համար: Պատասխանող կողմը տարիներ առաջ տնօրինել է մթերային խանութ, որը փակելու և պետական գրանցման վկայականը հանձնելու համար դիմել է Արտաշատի ՏՀՏ-ին 2007 թ. նոյեմբերի 19-ին և ստացել համապատասխան թույլտվությունը: ՏՀՏ-ն ընդունել է նրա դիմումը, սակայն չի տեղեկացրել իր ունեցած 120,000 դրամ հարկային պարտքի մասին: Այժմ այդ պարտքին ավելացել է նաև 80,228 դրամ տուգանք: «Նախ՝ իմ դիմումը չպետք է վերցնեին ու դադարեցնեին իմ գործունեությունը, եթե ես պարտք ունեի: Երկրորդ, 3 տարվա ընթացքում որևէ զգուշացում չեն ուղարկել ինձ ու միայն հիմա որոշեցին դատի կանչել: Իրենց սխալի պատճառով ոչ միայն տուգանք պիտի մուծեմ, այլև զրկվել եմ 3 տարվա աշխատանքային ստաժից»,- դժգոհում է նա: Օրենքից լավատեղյակ քաղաքացին պնդում է, որ 3 տարուց ավելի վաղեմություն ունեցող գործերը այլևս վավեր չեն: Տուժող կողմը պատրաստվում է բողոքարկել իր դեմ ընդունված որոշումը:
Գործի առթիվ հայցվոր կողմից պարզաբանումներ ստանալու ակնկալիքով դիմեցինք նաև Արտաշատի ՏՀՏ-ին, սակայն նրանք հրաժարվեցին մեզ տեղեկություն տրամադրելուց: