«Խոշտանգումների կանխարգելման եվրոպական հանձնաժողովը Գերմանիային կոչ է անում դադարել վիրահատելով ամորձատել այն անձանց, ովքեր սեռական հողի վրա հանցագործություն են կատարել»,– հաղորդում է BBC-ն: Եվրամիության փորձագետների կարծիքով՝ այն «ստորացնում է մարդու արժանապատվությունը»:
Համաձայն վիճակագրության` Գերմանիայում տարվա ընթացքում առնվազն 5 հանցագործ ընտրում է ամորձատումը, հույս ունենալով, որ այն կկրճատի ազատազրկման ժամկետը և կօգնի հաղթահարել սեռական ցանկությունը:
«Վիրահատական ամորձատումը հանգեցնում է այլանդակման: Այդ միջամտությունը տալիս է անդառնալի արդյունք: Այդ իսկ պատճառով ամորձատումը չի կարելի դիտել որպես հանցագործներին բուժելու միջոց»,- ասվում է Հանձնաժողովի հաշվետվության մեջ, որի հիմքում ընկած է Գերմանիայում 2010 թվականի նոյեմբեր-դեկտեմբեր ամիսներին անցկացված հետազոտությունը:
Խնդիրն այն է, որ գերմանացի պաշտոնյաներն ամորձատումը դիտում են ոչ թե որպես պատիժ, այլ՝ որպես բուժում: Սակայն չկա երաշխիք, որ տեստոստերոնի մակարդակը, որը պատասխանատու է սեռական ցանկության համար, իրականում իջնում է:
