Մարդու իրավունքների վիճակը Հայաստանում վատացել է: Այսօր կայացած մամուլի ասուլիսի ժամանակ այս մասին ասաց Հելսինկյան ասոցիացիայի նախագահ Միքայել Դանիելյանը` ներկայացնելով Հայաստանում մարդու իրավունքների իրավիճակի մասին ամենամյա իրենց զեկույցը:
«Այս տարի մեր զեկույցը իր մեջ ներառում է մի շարք ոլորտներ, այդ թվում` բանակը: Զեկույցում ներկայացված են բանակի հարցերով մի քանի գործեր: Ինչ վերաբերում է ՔԿՀ-ների վիճակին, որին ևս անդրադարձել ենք, ապա այս տարի մեզ արգելված էր մոնիթորինգ անցկացնել բանտերում: Արդարադատության նախարարը նամակով արգելել է մեզ այցելել ՔԿՀ-ներ: Դրա համար էլ գնացինք ուրիշ ուղիով. հավաքեցինք վերջին երկու տարիներին ազատ արձակված բանտարկյալների, որոնց էլ առաջարկեցինք մի հարցաշար` բանտերում տիրող իրավիճակի մասին: Պարզվեց` վիճակը բանտերում ընդհանրապես չի փոխվել: Արդարադատության նախարար Հրայր Թովմասյանը, ինձ թվում է, առհասարակ Հայաստանում չի ապրում, նրա հայտարարությունները, թե ՔԿՀ-ներում բարեփոխումներ են կատարվում, իրականությանը չեն համապատասխանում:
Մյուս հարցն այն է, որ մեզ` իրավապաշտպան կազմակերպություններիս, ստիպում են ատեստացիա անցնել: Կոնկրետ մեր կազմակերպությունն, իհարկե, նման քայլի չգնաց, և հրազդանյան ընտրություններին մենք դիտորդական առաքելություն իրականացրինք որպես լրագրողներ:
Հաջորդ անակնկալը փաստաբանների մասին օրենքի մեջ փոփոխություններ կատարելն է, որի վերաբերյալ մի մասնավոր զրույցի ժամանակ Փաստաբանների պալատի նախագահն ասաց` բա ՀՀ-ում եղած 1300 փաստաբանները փող չաշխատե՞ն»,- ասաց Միքայել Դանիելյանը:
Հաջորդ հարցը, որի վրա ուշադրություն սևեռեց իրավապաշտպանը, կրոնի և խղճի ազատության սահմանափակման խնդիրն է:
«Համաձայն «Եհովայի վկա» կազմակերպության կողմից տրամադրված տվյալների` 2012 թվականի հունվարի դրությամբ ՔԿՀ-ներում գտնվում են կազմակերպության 58 անդամներ, ովքեր իրենց կրոնական համոզմունքների պատճառով հրաժարվել են ծառայել ՀՀ զինված ուժերում: Մենք նրանց ներկայացնում ենք որպես խղճի գերիների: Միանշանակորեն, խղճի գերի ենք համարում նաև ՀԱԿ ակտիվիստ Տիգրան Առաքելյանին»,- նշեց Դանիելյանը` հավելելով, որ որոշ չափորոշիչներով՝ իրենք քաղբանտարկյալներ են համարում նաև հոկտեմբերի 27-ը իրականացնողներին:
