Փետրվարի 21-ին` ժամը 19.30-ին, ոստիկանության ծառայողները, գողություն կատարելու կասկածանքով, մետրոպոլիտենի «Երիտասարդական» կայարանի մերձակայքից բերման են ենթարկել 31-ամյա Արթուր Ե-ին:
«Առաջին լրատվական»-ին ոստիկանությունից հայտնում են, որ պարզվել է` նա 2011 թ. սեպտեմբերին Անդրանիկի փողոցի թիվ 44 շենքի մոտ կայանված «ՎԱԶ-2107» մակնիշի ավտոմեքենայի սրահից գողացել է բջջային հեռախոս:
Ոստիկանները պարզել են նաև, որ Արթուր Ե-ն կատարել է համանման մի շարք գողություններ ևս: Այսպես` 2011 թ. հոկտեմբերին Ծովակալ Իսակովի պողոտայի թիվ 44/4 շենքի բակում կայանված տաքսի ծառայություններից մեկին պատկանող «ՎԱԶ-2107» մակնիշի ավտոմեքենայի դուռը բացելով՝ սրահից գողացել է ռադիոկապի սարքը` պատճառելով 125.000 դրամի նյութական վնաս:
2011թ. հոկտեմբերին տղամարդը Ծովակալ Իսակովի պողոտայի թիվ 36 շենքի բակում կայանված «Ֆիատ-դուկատո» մակնիշի ավտոմեքենայի սրահից գողացել է հեռուստացույց` պատճառելով 30.000 դրամի նյութական վնաս, 2011թ. դեկտեմբերին Շերամի փողոցի թիվ 1 շենքի մոտ կայանված «ՎԱԶ-2109» մակնիշի տարանցիկ ավտոմեքենայի հետևի կողային ապակին հանելով՝ գողացել է 140.000 դրամի ապրանքներ, 2012թ. հունվարին Ծովակալ Իսակովի պողոտայի թիվ 36 շենքի բակում կայանված BMV X-5 մակնիշի ավտոմեքենայից գողացել է կողային հայելիները` պատճառելով 500.000 դրամի նյութական վնաս:
Նախաքննությունը շարունակվում է:
