«Եթե Հրազդանի քաղաքապետի ընտրություններն արդար չլինեին, Սասուն Միքայելյանն այսօր իրեն կճղեր»,- այսօր լրագրողների հետ հանդիպման ժամանակ իր կարծիքը հայտնեց ՀՀԿ անդամ Մենուա Հարությունյանը` խոսելով ՏԻՄ ընտրությունների, մասնավորապես՝ Հրազդանի քաղաքապետի ընտրությունների մասին:
Ըստ նրա՝ Հրազդանում ընտրությունները չեն կեղծվել, ընտրակաշառքներ չեն բաժանվել: Մենուա Հարությունյանը տեղեկացրեց, որ Հրազդանի ընտրություններից առաջ հարցումներ են իրականացրել Հրազդանի բնակիչների շրջանում: «Մեր հարցումների համաձայն՝ նա չպետք է ընտրվեր. մարդիկ կողմ էին, որ իշխանական թևի ներկայացուցիչը լիներ քաղաքապետ, և երկրորդ` նա արդեն մեկ անգամ եղել էր քաղաքապետ: Մենք մեր առջև խնդիր չունենք ամեն կերպ իշխանությունը պահելու: Մեր նպատակը նոր Հայաստանը կերտելն է, և մենք դա կանենք»,- ընդգծեց Մ. Հարությունյանը:
Համատեղ ասուլիսի ընթացքում ԱԺ «Ժառանգություն» խմբակցության պատգամավոր Արմեն Մարտիրոսյանն ասաց, որ զարմանալիորեն ընտրությունների ժամանակ Հրազդանում 3000-ով բնակչության թիվը մեծանում է՝ արտագաղթի այս պայմաններում, ընտրակաշառքներ են բաժանվում:
«Սա իրավապահ համակարգի քննարկման հարցն է, որը նրանք չեն իրականացնում: Հրազդանի ընտրություններում տեղամասերում խնդիրներ չառաջացան, խնդիրները մինչև տեղամասն էին առաջացել»,- մեկնաբանեց Ա. Մարտիրոսյանը` հավելելով, որ իշխանությունն իր ադմինիստրատիվ ռեսուրսն ու ֆինանսական միջոցներն է օգտագործել:
Մենուա Հարությունյանը հակադարձեց՝ ՏԻՄ ընտրություններն արդար են եղել: Ըստ նրա` եթե արդար չլինեին, ՀՀԿ ներկայացուցիչն Իջևանում չէր պարտվի: Նա ընդգծեց, որ գալիք ընտրությունները նույնպես արդար են լինելու, քանի որ այդ մասին հայտարարել է ՀՀ նախագահը, ում խոսքին նա չհավատալու պատճառ չունի:
«Այսօր Հայաստանը փոխվում է: Նիկոլ Փաշինյանն ասում է, որ խոսքի ազատություն չկա, մինչդեռ ոստիկանապետին անվանում է հոգեպես անհավասարակշռված: Մեկ օրում ոչինչ չի փոխվում»,- եզրափակեց Մենուա Հարությունյանը:
