էլիտար կրպակների շինարարությունը փորձում են շարունակել: «Սահակյան Շին» ընկերությանը պատկանող մեքենան արդեն մեկ ժամից ավելի է՝ կանգնած է Մաշտոցի պուրակում՝ փորձելով մոտենալ կրպակներին և շարունակել շինարարական աշխատանքները: «Մենք ենք այս քաղաքի տերը», «Մեր քաղաքը» նախաձեռնության անդամները և ակտիվիստները թույլ չեն տալիս, որպեսզի բեռնատարը շարժվի կրպակների ուղղությամբ:
Այս պահին ոստիկանության Կենտրոնի բաժանմունքի աշխատակիցները, Կենտրոն վարչական շրջանի փոխոստիկանապետ Արայիկ Պետրոսյանը փորձում են ակցիայի մասնակիցներին համոզել, որպեսզի նրանք ազատեն բեռնատարի ճանապարհը: Ոստիկանների խոսքով՝ նրանք խախտում են հանրային կարգը, սակայն, ըստ ակցիայի մասնակիցների, ոստիկանությունը պարտավոր է պաշտպանել իրենց և թույլ չտալ վրաերթի ենթարկել ակտիվիստներին:Արայիկ Պետրոսյանը չի պատասխանել լրագրողների հարցերին:
Ինչպես «Առաջին լրատվական»-ին տեղեկացրեց ակտիվիստներից մեկը, քիչ առաջ նրանք դիմել են ՄԻՊ գրասենյակ և սպասում են նրանց ներկայացուցիչներին:
Հիշեցնենք նաև, որ երկու օր առաջ տեղի է ունեցել հանդիպում Երևանի քաղաքապետ Տարոն Մարգարյանի հետ: Վերջինս վստահեցրել էր, թե շինարարությունը կդադարեցվի մինչև էլիտար կրպակների տեղադրման հետ կապված քննարկումներն ավարտվեն: Սակայն այս պահին «Սահակյան Շին» կազմակերպությունը փորձում է շարունակել էլիտար կրպակների շինարարական աշխատանքները:
