Փող ունես, ուրեմն կարող ես պատգամավորության թեկնածու առաջադրվել, չունես` ոչ: Այսօր կայացած մամուլի ասուլիսի ժամանակ նման համոզմունք հայտնեց «Ժառանգություն» կուսակցության պատգամավոր Լարիսա Ալավերդյանը:
«Եթե քաղաքացին մեկ մլն դրամ ունի, ուրեմն ունի նաև անսահմանափակ հնարավորություններ: Միաժամանակ, վատ է, երբ Հայաստանում` ամեն շենքում փող բաժանող կա, և նրա մասին բոլորը գիտեն: Իշխանություններին եմ հարցնում` գիտե՞ք առհասարակ ընտրակաշառքի լկտի գործընթացների մասին»,- ասաց նա:
Ասուլիսի մյուս բանախոս ՀՀԿ-ական պատգամավոր Հովհաննես Սահակյանն իր հերթին անդրադառնալով հարյուր տոկոսանոց համամասնական ընտրակարգի շուրջ երեկ ԱԺ-ում ծավալված լսումներին` նշեց, որ կարևորը ոչ թե համամասնական-մեծամասնական ընտրակարգն է, այլ լավ ընտրություններ անցկացնելու կամքը:
«Ամենամեծ թիվն այդ լսումների ժամանակ հանրապետականներն էին կազմում, մնացածներն իրենց ամպագոռգոռ ելույթներից հետո լքում էին դահլիճը` չլսելով մեր տեսակետները: Այդ է պատճառը, որ մենք կարծում ենք` համամասնական ընտրակարգի մասին այդ ուժերի խոսակցություններն ընդամենը նախընտրական PR էին:
ՀՀԿ-ն մնում է այն տեսակետին, որ մեր տիպի կառավարման համակարգում հարյուր տոկոսանոց համամասնական ընտրակարգը ձեռնտու չէ»,- ասաց Սահակյանը:
Պատասխանելով ժառանգական պատգամավորի` ընտրակաշառքների մասին հարցին` ՀՀԿ ներկայացուցիչը նկատեց, որ դա ամենաբարդ ու արատավոր, ամենադժվար ապացուցելի երևույթներից է:
«Բայց իշխանություններն ունեն արդար ու թափանցիկ ԱԺ ընտրություններ անցկացնելու կամք: Բացի այդ, հասարակությունը պետք է մերժի այդ արատավոր երևույթը»:
Լարիսա Ալավերդյանն իր հերթին նախընտրական PR համարեց ՀՀԿ-ի` անվճար վիրահատություններ կազմակերպելու, ընտրողներին բնակարաններ ու ակնոցներ բաժանելու դեպքերը: «Համամասնականի մասին լսումները բոլորովին էլ PR չեն, այլ քաղաքական լուրջ նախաձեռնություն»,- հակադարձեց նա:
