ԱԺ-ում այսօր մեկնարկած համամասնական ընտրակարգի վերաբերյալ խորհրդարանական լսումներին ելույթ ունեցավ արդարադատության նախարար Հրայր Թովմասյանը:
Ընտրական օրենսդրությունը առավել շատ քննարկված թեմաներից մեկն է, նշեց նա` անցնելով թեմայի փորձագիտական վերլուծությանը. «Ընտրական համակարգը արտացոլում է այդ մարմնի ներկայացուցչականությունն ու արդյունավետությունը: Որն է համամասնական ընտրակարգի առավելությունը` այն ապահովում է առավել ներկայացուցչություն»: Նախարարը ներկայացրեց միջազգային երկրների փորձը՝ ընտրակարգերի վերաբերյալ:
«Հայ ժողովուրդը մի առանձնահատկություն ունի` բոլորը բոլորին մեղադրում են, բայց ոչ իրենց: Իսկ գուցե քաղաքական ուժե՞րն են մեղավոր… Գուցե ընդդիմությո՞ւնը հզոր դեմքեր պետք է ունենա, որպեսզի պայքարի և հաղթի նաև մեծամասնական ընտրակարգում»,- նկատեց նա:
«Աճուրդներ կարելի է կազմակերպել համամասնական ցուցակներում ընդգրկվելու համար, ի՞նչ է` միայն համամասնականի դեպքում վարչական ռեսուրսը չի՞ օգտագործվելու: Ո՞նց է այս խորհրդարանում հայտնվել «Շամիրամ» կուսակցությունը… »,- հռետորական հարց ուղղեց Հրայր Թովմասյանը՝ նկատի ունենալով համամասնական ընտրակարգով նրանց՝ խորհրդարանում հայտնվելը:
«Այո, մենք խնդիր ունենք ապահովել արժեհամակարգ: Այստեղ նստած է Դավիթ Հարությունյանը, ով մեծամասնական ընտրակարգով է ընտրվել, այնպես որ՝ խոսող պատգամավորը լավն է, չխոսողը` վատը ձևակերպումը այստեղ էլ միանշանակ չէ: Թե ինչ պատկեր պետք է ունենա հաջորդ խորհրդարանը, այդ հարցի պատասխանը այլ հարթությունում է»,- եզրափակեց արդարադատության նախարարը:
Իր ելույթում Դավիթ Հարությունյանը անդրադարձավ այն հարցին, թե կա՞ արդյոք լավագույն մոդել: «Գոյություն չունի լավագույն մոդել, մոդելը կիրառելի է կոնկրետ երկրի, կոնկրետ այդ երկրի զարգացման տեսանկյունից: Աշխարհի բոլոր երկրներում ընտրական իրավունք ունի անձը, այլ ոչ թե կուսակցությունը»-, նկատեց նա:
«Համամասնական ընտրակարգով կուսակցությունների առաջին դեմքերը հրաժարվում են մանդատից, գալիս են խորհրդարան հանրությանը անհայտ անհատներ: Առանց մեծամասնականի ընտրողը չունի կոնկրետ դեմք, որին կարող է ընտրել, կորում է պատգամավոր-հասարակություն կապը` պատասխանատվության տեսանկյունից:
Մենք կուսակցություններում ունե՞նք ներքին ժողովրդավարություն: Եթե այս հարցին պատասխանենք, ապա պետք է եզրակացնենք. հարյուր տոկոսանոց համամասնական ընտրական համակարգը կխթանի կուսակցական ղեկավարության դիկտատուրան կուսակցությունների ներսում»,- նշեց Դ. Հարությունյանը:
