2010թ.-ի դեկտեմբերի 21-ին Քաջարան համայնքի ավագանին միաձայն հաստատեց քաղաքի 2011 թվականի բյուջեն: Այն կազմում է 212 մլն 985 հազար դրամ: Նախորդ տարվա համեմատ համայնքային բյուջեն պակաս է մոտ 80 մլն դրամով, ինչը, քաղաքապետ Վարդան Գևորգյանի խոսքով, պայմանավորված է նրանով, որ այս տարի կառավարությունը բնապահպանման մասհանումներ չի նախատեսել համայնքի համար: Նշենք, որ Զանգեզուրի պղնձամոլիբդենային կոմբինատը Քաջարան քաղաքի վարչական սահմանում է: Քաղաքապետը, սակայն, հույսը չի կորցնում եւ համոզված է, որ ֆինանսավորման այլ աղբյուրների միջոցով հնարավոր կլինի այս տարի լուծել համայնքի խնդիրները: Բյուջեի նախագիծը մշակելիս հաշվի են առնվել առաջին հերթին քաղաքի հրատապ լուծում պահանջող խնդիրները: Պահպանվել են համայնքի խոցելի խմբեր համարվող` առաջին կարգի հաշմանդամների, երկկողմանի ծնողազուրկ, վիրավոր և զոհված ազատամարտիկների, անչափահաս երեխա ունեցող միայնակ մայրերի ընտանիքների համար սահմանված որոշակի զեղչերը: Մասնավորապես` զեղչերը վերաբերում են խմելու ջրի, աղբահանության, բնակելի շենքերի սպասարկման ու պահպանման վարձավճարներին: Ըստ Վարդան Գևորգյանի` Քաջարանը եզակի քաղաքներից է, որտեղ նման արտոնություններ կան: «Ընդ որում, գործում են զոհված ազատամարտիկների ընտանիքների համար` 100 տոկոս, արտադրության մեջ դժբախտ պատահարի հետևանքով մահացածների ընտանիքների համար` 50 տոկոս, երկկողմանի ծնողազուրկ երեխաների համար` 100 տոկոս, անչափահաս երեխա ունեցող միայնակ մայրերի ընտանիքների համար` 50 տոկոս զեղչեր: Բացի դրանցից, Քաջարանը միակ համայնքն է, որտեղ խմելու ջրի համար ջրաչափեր չեն տեղադրվել»,- ասում է քաղաքապետը: Քաղաքապետարանի ենթակայության հիմնարկների հաստիքացուցակներում տարեվերջին նախապես հայտարարարված կրճատումներ չեն եղել: Ի դեպ, Սերժ Սարգսյանի կարգադրությամբ 2010թ.-ի տարեվերջին ֆիզիկական կուլտուրայի և սպորտի բնագավառում ՀՀ նախագահի մի շարք մրցանակներ են շնորհվել` հաշվի առնելով 2010թ. հանրապետական ստուգատեսների արդյունքները: Ըստ այդմ` «Լավագուն քաղաքային մարզական համայնք» անվանակարգում երկրորդ տեղի մրցանակը շնորհվել է Քաջարան քաղաքային համայնքին: