Այցով Բուլղարիայի մայրաքաղաք Սոֆիայում գտնվող ԱՄՆ պետքարտուղար Հիլարի Քլինթոնը երկրի իշխանություններին կոչ է արել դիվերսիֆիկացնել իր ածխաջրածնային հումքի պահեստները: ԱՄՆ պետքարտուղարի խոսքերն առաջին հերթին վերաբերել են Ռուսաստանից ներկրվող նավթի ու գազի պաշարներին: Այս մասին հաղորդում է Associated Press գործակալությունը:
Բուլղարիայի վարչապետ Բոյկո Բորիսովի հետ բանակցություններում նա նկատել է, որ ԱՄՆ-ն կարող է հուսալի գործընկեր դառնալ հանրապետության էներգետիկ անվտանգության ապահովման հարցում, և դրա համար լուրջ ներուժ կա ամերիկայն ընկերությունների համար:
Բացի այդ` Քլինթոնը հաղորդել է, որ թեմայի հետագա քննարկման համար այս շաբաթ Սոֆիա կժամանի Եվրասիայում էներգետիկայի գծով պետդեպի հատուկ ներկայացուցիչ Ռիչարդ Մորնինգսթարը:
Խոսելով Ռուսաստանից ներկրվող գազի մատակարարման վիճակի մասին` Հ. Քլինթոնը դա բնութագրել է որպես «խոցելի», իսկ Մոսկվայի կողմից հնարավոր քաղաքական ճնշումները էներգետիկ անվտանգության միջոցով` «անառողջ»:
Բացի այդ` պետքարտուղարն ընդգծել է Բուլղարիայի ԱՄՆ-ի միջև գործընկերային հարաբերությունների կարևորությունը:
«Որպես ՆԱՏՕ-ի գործընկերներ՝ Բուլղարիան և ԱՄՆ-ը անվտանգության տեսանկյունից սերտորեն շաղկապված են շատ կողմերով` սկսած Աֆղանստանում զորամիավորումների մատակարարումների կազմակերպումից մինչև Կոսովոյի խաղաղապահ առաքելությունը»,- հայտարարել է Քլինթոնը` հավելելով, որ այս տարի երկրի զինված ուժերը կմասնակցեն ՆԱՏՕ-ի շրջանակում կայանալիք մարտական պատրաստականությանը, ինչպես նաև կանցկացվեն երկու երկրների զորավարժությունները:
Հիշեցնենք, որ 2011 թ. Բուլղարիան ամերիկյան Chevron ընկերությանը լիցենզիա էր տրամադրել թերթաքարային գազի հանքավայրի ուսումնասիրության համար:
Բ. Բորիսովի խոսքով` աշխատանքների շարունակության համար անհրաժեշտ է իրականացնել մի շարք փորձաքննություններ, որոնք կհաստատեն հորատման բնապահպանական անվտանգությունը:
