ՀՀ Մարդու իրավունքների պաշտպանի առաջին տեղակալ Աշոտ Վահանյանն «Առաջին լրատվական»-ի հետ զրույցում հավաստիացրեց, որ իրենց գրասենյակի արագ արձագանքման խմբի աշխատակիցները սեփական նախաձեռնությամբ այցելել են «Նուբարաշեն» ՔԿՀ-ում կալանքի տակ պահվող «Հայկական ժամանակ» օրաթերթի թողարկման պատասխանատու Հայկ Գևորգյանին: Ըստ Աշոտ Վահանյանի, Հայկը իրեն լավ է զգում և իր հանդեպ բռնությունների մասին հայտարարություն չի արել:
«Մենք, երևի, առաջինն ենք, որ հանդիպել ենք Հայկ Գևորգյանի հետ, մեր աշխատակիցներն այժմ հետդարձի ճանապարհին են: Լրագրողի հանդեպ որևէ ճնշում կամ բռնություն չի գործադրվել: Նա լրիվ հանգիստ վիճակում է գտնվում: Մեր աշխատակիցների հարցին՝ ինչո՞վ կարող ենք օգտակար լինել, Հայկ Գևորգյանը որևէ խնդրանք չի փոխանցել: Ընդ որում, արագ արձագանքման խումբը ՔԿՀ մեկնել է ոչ թե ահազանգի հետքերով, այլ սեփական նախաձեռնությաբ»,- ասաց Աշոտ Վահանյանը:
Հարցին՝ պատրաստվո՞ւմ են ՄԻՊ-ի գրասենյակի աշխատակիցները կրկին այցելել լրագրողին, նա ասաց, որ միայն՝ իրավիճակի փոփոխության դեպքում: «Եթե Գևորգյանը չի հայտարարում, որ ասենք գիշերն իր վրա ճնշումներ են գործադրվել, մենք նրան կրկին այցելելու խնդիր չունենք»,- ասաց Վահանյանը:
Նա նաև նշեց, որ տեղյակ չէ՝ արդյո՞ք օմբուդսմեն Կարեն Անդրեասյանը պատրաստվում է Հայկ Գևորգյանի կալանքի մասին հայտարարությամբ հանդես գալ, թե՞ ոչ:
Հիշեցնենք, որ այսօր տանից դուրս գալու պահին քաղաքացիական հագուստով անձինք, ոլորելով «Հայկական ժամանակ» օրաթերթի թողարկման պատասխանատու Հայկ Գևորգյանի ձեռքերը, նրան տարել են անհայտ ուղղությամբ։ Ոստիկանության հաղորդմամբ, Հայկ Գևորգյանը հունվարի 23-ից գտնվել է հետախուզման մեջ՝ ինչ-որ քաղաքացու իբր վրաերթի ենթարկելու կասկածանքով: Հայկ Գևորգյանն այժմ պահվում է «Նուբարաշեն» ՔԿՀ-ում է:
