Վարդան Բոստանջյանը հայտնել է իր անձնական կարծիքը: Այսօր լրագրողների հետ հանդիպման ժամանակ հայտնեց ԱԺ ՀՀԿ-ական պատգամավոր Գագիկ Մելիքյանը` անդրադառնալով օրեր առաջ ԲՀԿ պատգամավոր Վարդան Բոստանջյանի հայտարարությանը:
Նա նշեց՝ չի կարծում, թե ԲՀԿ դիրքորոշման մեջ որևէ փոփոխություն է իրականացվել. կուսակցությունը կոալիցիոն գործընկեր է և երբևէ պաշտոնական մակարդակով իր անհամաձայնությունը չի հայտնել կոալիցիոն հուշագրի վերաբերյալ:
«ԲՀԿ պատգամավորների կողմից կարծիքների փոխանակումը կարող է համընկնել կուսակցության կարծիքի հետ, կարող է` ոչ: ԲՀԿ-ն շարունակում է լինել կոալիցիոն դաշնակից ՕԵԿ-ի և ՀՀԿ-ի համար»,- նշեց ՀՀԿ-ականը` հավելելով, որ ԲՀԿ-ի ներսում միգուցե ներքին անհամաձայնություններ կան, իսկ պաշտոնական դիրքորոշման փոփոխություն չկա:
Նա նաև նշեց, որ գոյություն ունի ընտրական գործընթաց և մրցակցություն:
Անդրադառնալով համամասնական և մեծամասնական ընտրակարգերին` Գ. Մելիքյանն ասաց, որ
դա առաջարկություն չէր, այլ ընդամենը քաղաքական փուչիկ, որը պայթեց:
ՀՀԿ-ական պատգամավորի կարծիքով՝ ՀՀԿ համամասնական ցուցակը պետք է գլխավորի Սերժ Սարգսյանը:
