Ամերիկյան ազդեցիկ Bipartisan Policy Center կազմակերպությունը, որի մեջ մտնում են թոշակի անցած գեներալներ, հետախույզներ և քաղաքական գործիչներ ինչպես հանրապետական, այնպես էլ դեմոկրատական կուսակցությունից, Իրանի դեմ գործողությունների փաթեթ է պատրաստել:
Ինչպես հաղորդում է իսրայելական Haaretz թերթը, փաստաթուղթը պաշտոնապես կներկայացվի այսօր: Թերթի տեղեկություններով՝ դրանում ասվում է, որ ԱՄՆ արտաքին քաղաքականության կարևորագույն խնդրիներից է թույլ չտալ Թեհրանին ռազմական միջուկային լիցք ստանալ:
Այդ խնդիրն իրականացնելու համար Bipartisan Policy Center-ն առաջարկում է Բարաք Օբամայի վարչակարգին մի շարք կոնկրետ քայլեր ձեռնարկել. բարձրացնել ձայնը Իրանի հետ քննարկումներում, նրա դեմ առավել խիստ պատժամիջոցներ կիրառել և նախապատրաստվել նրա դեմ ռազմական գործողությունների, որ ուղղված կլինեն այդ երկրի միջուկային արդյունաբերության ոչնչացմանը:
«Միացյալ Նահանգները պետք է Իրանի առջև հստակ այլընտրանք դնի. կամ նա հրաժարվում է իր միջուկային ծրագրից բանակցությունների միջոցով, կամ դա կոչնչացվի ռազմական ճանապարհով՝ ամերիկյան և/կամ իսրայելական»,- իրենց դիրքորոշումը մեկնաբանել են զեկույցի հեղինակները:
Ընդ որում նշվում է, որ Իրանի վրա հարձակումից առաջ պետք է մեկուսացնել այդ երկիրը և նրան արգելել ներմուծել թեթև նավթամթերք: Եթե անգամ դա չօգնի, միակ այլընտրանքը մնում է ռազմական գործողությունը:
Զեկույցի հեղինակները նշել են, որ Իրանի դեմ լայնածավալ պատերազմը ցանկալի չէ, ուստի խորհուրդ են տալիս ԱՄՆ ղեկավարությանը մի քանի շաբաթում «վիրահատական» ռազմաօդային գործողություններ անցկացնել, որին զուգընթաց օգտագործել հատուկ նշանակության ուժերը հակառակորդի առանցքային նշանակություն ունեցող օբյեկտները շարքից հանելու համար:
Օբամայի վարչակարգը նույնպես խոր անհանգստություն է հայտնում իրանական միջուկային ծրագրի շուրջ: Այսպես, The New York Times-ը գրում է, որ ԱՄՆ ազգային հետախուզության ղեկավար Ջեյմս Կլապերը հայտարարել է, որ Իրանը գնալով ավելի լուրջ սպառնալիք է ներկայացնում ԱՄՆ անվտանգությանը: Նրա խոսքերով՝ պատերազմի դեպքում իրանցիները կփորձեն ահաբեկչություններ իրականացնել ԱՄՆ տարածքում:
Վերջին մի քանի ամիսների ընթացքում Իրանի և Արևմուտքի միջև հարաբերությունները խիստ սրվել են: ԱՄՆ-ը և Եվրոպան Թեհրանի դեմ կոշտ տնտեսական պատժամիջոցներ են սահմանել՝ պահանջելով դադարեցնել միջուկային ծրագիրը: Ի պատասխան՝ Իրանը սպառնում է դադարեցնել Պարսից ծոցից նավթի մատակարարումը համաշխարհային շուկա:
