Տասը միլիոն դոլար արժողությամբ ալմաստներով լի պայուսակը երկու երիտասարդ բերել են եգիպտական Al-Mihwar հեռուսատալիքի «90 րոպե» ծրագրի ուղիղ եթեր: Ինչպես հայտնում է Al-Ahram թերթը, նրանք եկել էին ՀԱՀ-ից` անօրինական ձեռք բերած թանկարժեք քարերը վաճառելու համար:
Նրանք ծրագրի խմբագիրներին պատմել են, որ ցանկանում են ուղիղ եթերում կամովին պետությանը հանձնել ՀԱՀ-ից անօրինական բերված ալմաստները: Հեռուստատեսությունում հյուրերին հավատացել են և որոշել են թողնել ուղիղ եթեր:
Շփոթված հաղորդավարուհին հանդիսատեսներին ցուցադրել է հսկայական մեծության քարերը, այնուհետև դիմել է զինվորականներին` որքան հնարավոր է՝ արագ ապահովել անվտանգությունը, քանի որ ստուդիայում հայտնված երիտասարդներին բազմիցս սպառնացել են հաշվեհարդար տեսնել:
Երիտասարդները պատմել էին, որ 2010 թվականի վերջին ՀԱՀ-ում նրանց հետ կապ է հաստատել Մուստաֆա անունով մեկը, որը հինգ միլիոն եգիպտական ֆունտ (մոտ 828 հազար դոլար) է առաջարկել 10 միլիոն դոլար արժողությամբ ալմաստները անօրինական Եգիպտոս տեղափոխելու համար:
«Այդպիսի գումարից, իհարկե, ոչ ոք չի հրաժարվում: Ճիշտ է, մենք մինչև վերջին պահը վախենում էինք, որ Կահիրեի օդանավակայանում մեզ կստուգեն և կհայտնաբերեն քարերը, սակայն, ինչպես խոստացել էր Մուստաֆան, մաքսատան աշխատակիցները նույնիսկ մեր կողմը չնայեցին, և մենք անարգել բերեցինք բեռ»,- պատմել է Ահմեդ Բադոն:
Նրա խոսքերով՝ օդանավակայանում նրանց զանգահարել է Մուստաֆան և պահանջել, որ քարերը ոչ ոքի չտան, ինչպես նախկինում էին պայմանավորվել, այլ իրենք տանեն Կահիրե և սպասեն մինչև նրանց հետ կապ հաստատելը: Սակայն հաջորդ օրը` 2011 թվականի հունվարի 25-ին, սկսվել է ապստամբությունը: Որոշ ժամանակ նրանց հետ ոչ ոք կապ չի հաստատել, սակայն հետագայում սկսել են սպառնալ և Մուստաֆան, և անհայտ անձինք: Նրանք պահանջել են քարերը հանձնել` խոստանալով վճարել ընդամենը երկու միլիոն: Սակայն երիտասարդները չեն համաձայնել և մինչև այժմ գտնվել են փախուստի մեջ: Այս ընթացում նրանք 200 ալմաստից 26-ից զրկվել են. մի քանի անգամ նրանց մոտ են եկել «գնորդներ», «փորձաքննության համար» օրինակ վերցրել և չեն վերադարձրել:
Որպեսզի վերացնեն այս «արատավոր շրջանը» երիտասարդները որոշել քարերը հանձնել պետությանը, սակայն վախեցել են և կասկածել բոլորին: Նրանք չեն գնացել ոստիկանություն` վախենալով, որ «կոռումպացված սպաները կվերցնեն ալմաստները, իսկ իրենց բանտ կնստեցնեն:
Իսկ ուղիղ եթերում հայտնվելու դեպքում նրանց տեսնելու էին միլիոնավոր մարդիկ, և նրանք հնարավորություն ունեին բոլորին պատմելու այդ պատմությունը և հայտարարելու, որ քարերը հանձնում են պետությանը:
Այս ամենից հետո երիտասարդների և թանկարժեք քարերի անվտանգությունն ապահովելու համար հեռուստատեսության շենքի մոտ են ժամանել մի քանի զրահամեքենաներ: Բարձրաստիճան սպաները սպասել են հաղորդման ավարտին, ձևակերպել թանկարժեք քարերի հանձնման փաստաթղթերը, ինչպես նաև իրենց պատասխանատվության տակ վերցրել ապաշխարող մաքսանենգներին: