Լեհաստանի «Սոլիդարնոստ» շարժման հիմնադիր, Լեհ Վալենսայի մերձավոր զինակից, այժմ «Գազետա Վիբորչայի» գլխավոր խմբագիր Ադամ Միխնիկը Երեւանի պետական համալսարանում ուսանողների հետ հանդիպմանը հայտարարել է. «Ես բացարձակապես Հայաստանում ժողովրդավարության գծով մասնագետ չեմ: Ամեն ինչ կախված է համեմատությունից: Ուզբեկստանի համեմատ, այստեղ 100-տոկոսանոց անգլիական ժողովրդավարություն է:
Դուք ունեք խնդիրներ: Մյուս երկրներն էլ ազատ ժողովրդավարության են անցել ավտորիտարիզմից. դա ոչ միայն Հայաստանն է, այլեւ Վրաստանը, Ուկրաինան, Հունգարիան: Մենք բոլորս էլ դեռ կենդանի ենք, եւ մեր մաշկի տակ ապրում է խորհրդային ավտորիտարիզմը»,- ասել է նա: Միխնիկի խոսքով, կա հայկական մի ֆենոմեն. մի կողմից՝ մեծ մշակույթ, քրիստոնեություն, մյուս կողմից՝ վերջին 20 տարում ընտրությունների ժամանակ ցույցեր, բողոքներ ենք տեսել: Իսկ ինչ վերաբերում Ադրբեջանի ժողովրդավարությանը, Միխնիկն այն համեմատել է չորսգլխանի ձիու հետ: «Իսկ ինչպե՞ս եք գնահատում չորսգլխանի ձիուն, որպիսին գոյություն չունի: Մեզ մոտ լրագրող կա, որը գրում է՝ շունը կատու է: Նույնկերպ դուք ասում եք՝ Ադրբեջանում ժողովրդավարություն է»:
