«Ամերիկայի Ձայն»-ի հաղորդմամբ՝ Սոմալիի զինյալների «Ալ-Շաբաբ» խմբավորումն արգելել է իր վերահսկողության տակ գտնվող տարածքում Կարմիր խաչի միջազգային կոմիտեի գործունեությունը:
«Ալ-Շաբաբ»-ի կողմից երկուշաբթի օրը տարածված հաղորդագրության մեջ նշվել է, որ Կարմիր խաչը «չարաշահել է» տեղական ինքնակառավարման մարմինների պաշտոնատար անձանց վստահությունը՝ մեղադրելով խմբավորման զինյալներին «սննդամթերքի բաշխման համար խոչընդոտներ ստեղծելու մեջ»:
Կարմիր խաչի միջազգային կոմիտեն խմբավորման այս հայտարարության վերաբերյալ դեռևս որևէ արձագանք չի տրամադրել:
Մարդասիրական միջազգային այս կազմակերպությունը հունվար ամսվա սկզբին հայտնել է Սոմալիի կենտրոնական և հարավային մասերում բնակվող ավելի քան մեկ միլիոն մարդու համար նախատեսված պարենային օգնության բաշխումը դադարեցնելու մասին՝ տեղական իշխանությունների կողմից Սոմալիի երկու շրջանում պարենի բաշխման գործընթացին խոչընդոտելու պատճառով:
Աֆրիկայի թերակղզում բազում տարիներ տևող հակամարտության պատճառով Սոմալիի միլիոնավոր բնակիչների գոյությունը կախված է օտարերկրյա պետությունների կողմից տրամադրվող մարդասիրական օգնությունից:
Կարմիր խաչի միջազգային կոմիտեն այն սակավաթիվ կազմակերպություններից էր, որոնք դեռևս գործում են «Ալ-Շաբաբ»-ի կողմից վերահսկվող տարածքներում:
