«Նիկո» ՍՊԸ-ի տարածքում տեղի ունեցած միջադեպի գործով երկու հոգի ձերբակալվել է: Այս մասին «Առաջին լրատվական»-ին տեղեկացրին ոստիկանության հասարակայնության հետ կապերի բաժնից: Այս պահին խուլիգանություն կատարելու մեղադրանքով ձերբակալված են Էդգար Նահապետյանը և Նարեկ Մանվելյանը:
Հիշեցնենք, որ հունվարի 17-ին՝ ժամը 16.50-ին, «Նիկո» ՍՊԸ նախագահը դիմել էր ոստիկանության Արաբկիրի բաժին և հայտնել, որ ժամը 16.30-ի սահմաններում մի քանի երիտասարդներ փորձել են մտնել Տիգրանյան փողոցում գտնվող «Նիկո» կահույքի սրահ, սակայն ինքը թույլ չի տվել, որից հետո երիտասարդները սրահի դիմաց վիճաբանել են իր եղբորորդու հետ, իսկ 10 րոպե անց հնչել են կրակոցներ, ինչի հետևանքով վնասվել են սրահի պատուհանի ապակիները:
Դեպքի վայր մեկնած օպերատիվ խումբը հայտնաբերել էր «ՊՍՄ» ատրճանակի 5.45 մմ տրամաչափի 4 պարկուճ և 2 գնդակ, 9 մմ տրամաչափի գազային ատրճանակի 4 պարկուճ, 9 մմ տրամաչափի գնդակի 1 բեկոր և «Մակարով» ատրճանակի 9 մմ տրամաչափի 3 պարկուճ, իսկ դեպքի վայրից մոտ 70 մ հեռավորության վրա հայտնաբերվել է 12 մմ տրամաչափի որսորդական հրացանի կրակված 4 պարկուճ:
Նույն օրը՝ ժամը 18.45-ին, ոտքի հրազենային վնասվածքով հիվանդանոց բուժօգնության էր դիմել 23-ամյա Տիգրան Հ.-ն, որը, ըստ բժշկի տեղեկանքի, ի վիճակի չէր եղել բացատրություն տալու:
Ձեռնարկված օպերատիվ-հետախուզական միջոցառումների շնորհիվ պարզվել էր, որ երիտասարդը վնասվածքն ստացել էր «Նիկո» կահույքի սրահի մոտ տեղի ունեցած միջադեպի ժամանակ արձակված կրակոցներից:
Հարուցվել է քրեական գործ ՀՀ Քրեական օրենսգրքի 258 հոդվածի 4-րդ մասի և 235 հոդվածի 1-ին մասի հատկանիշներով:
