«Առաջին լրատվականը» ԵՊՀ Արվեստի պատմության ամբիոնի վարիչ, արվեստագիտության դոկտոր Լևոն Չուգասզյանից հետաքրքրվեց, թե ինչ հետևանքներ կարող են ունենալ «Լեզվի մասին» և «Հանրակրթության մասին» օրենքներում կատարված փոփոխությունները, որոնց կողմ քվեարկեց ԱԺ 69 պատգամավոր: Լևոն Չուգասզյանը ուշադրություն է հրավիրում այն հանգամանքի վրա, որ Հայաստանը տարածաշրջանում համարվում է միատարր երկիր, և երկպառակությունների համար այստեղ հիմք չկա: Պառակտումը, ըստ մեր զրուցակցի, սոցիալական բևեռացման հետևանք է: Լևոն Չուգասզյանը կարծում է, որ եթե բացվեն օտարալեզու դպրոցներ, ապա կարող է առաջանալ կաստայականություն, և հասարակությունը կբաժանվի մշակութային հատվածների: Օտարալեզու կրթություն ստացող քաղաքացին, ըստ մեր զրուցակցի, ավելի շատ ձգտում կունենա մեկնել և ապրել արտերկրում, քանի որ կդառնա օտար մշակույթի կրողը: «Իսկ դա կխթանի արտագաղթը և կդառնա ազգային անվտանգության խնդիր»,- կարծիք հայտնեց Լևոն Չուգասզյանը: «Առաջին լրատվական»-ի հետ զրույցում նա նշեց, որ պետք է օտարալեզու դպրոցներ բացելուց առաջ մտածել, թե ինչ քայլեր են հաջորդելու դրան: Մեր զրուցակիցն ասաց նաև, որ այդ դեպքում կառաջանա խտրականություն: Նա մտավախություն հայտնեց, որ մայրենի լեզվի դիրքերը կթուլանան նաև բանակում: Եթե անգամ այդ դպրոցների թիվը լինի սահմանափակ, ապա ըստ Լևոն Չուգասզյանի` շատերը կպահանջեն, որ դրանք ավելանան, որպեսզի հետագայում էլ իրենց զավակները բուհական լավ կրթություն ստանան: Մեր զրուցակիցն առաջարկում է ոչ թե բացել օտարալեզու դպրոցներ, այլ բարելավել կրթության որակը բոլոր դպրոցներում և օտար լեզվի ուսուցումը խորացնել: Իսկ ԱԺ պատգամավորների քվեարկությունը, Լևոն Չուգասզյանի հավաստմամբ, ցույց տվեց, թե որքան ծախու է մեր Ազգային ժողովը:
