«Օսկար»–ի հանձնման արարողությունը «Կոդակ» սրահից կարող է տեղափոխվել Լոս Անջելեսի կենտրոնում կառուցված «Նոկիա» սրահ: Այս մասին հաղորդում է The Los Angeles Times-ը:
Կինեմատոգրաֆիական գիտությունների և արվեստի ակադեմիան (Academy of Motion Pictures Arts & Sciences), որի անդամներն ընտրում են մրցանակակիրներին, և երկու կինոթատրոնների սեփականատերերը հրաժարվում են մեկնաբանել ստեղծված իրավիճակը։
Ըստ The Los Angeles Times թերթի՝ այս տարի լրանում է Ակադեմիայի և «Կոդակ» թատրոնի միջև կնքված պայմանագրի ժամկետը, և ակադեմիկոսները հնարավորություն ունեն ավելի շահավետ պայմաններ ձեռք բերել: Բացի այդ, «Նոկիա» սրահը, որում անց է կացվում «Գրեմմի» մրցանակաբաշխությունը, երկու անգամ ավելի շատ հանդիսատես կարող է ընդունել, իսկ մոտակայքում տեղակայված հյուրանոցները հնարավորություն կտան հյուրերին մրցանակաբաշխությունից հետո շարունակել տոնախմբությունը:
Հոլիվուդի քաղաքային խորհրդի և առևտրի պալատի ներկայացուցիչները բացասական են վերաբերվել սրահի փոփոխության գաղափարին։ Կինորավեստի Ակադեմիայի ներկայացուցիչը Deadline.com կայքին հայտնել է, որ արարողության տեղափոխման մասին լուրերը «ճիշտ չեն»:
Հիշեցնենք, որ «Օսկար»–ի հանձնման արարողությունը տեղի կունենա փետրվարի 26-ին և ուղիղ եթերով կհեռարձակվի աշխարհի ավելի քան 225 երկրներում:
