Հունվարի 13-ին տեղի կունենա հերթական դատական նիստն ընդդեմ Բնապահպանության նախարարության: Թռչնասերների կենտրոնը և «Էկոդար» հասարակական կազմակերպությունը դատի էին տվել ՀՀ բնապահպանության նախարարությանը: Նրանք հայցադիմում էին ներկայացրել ՀՀ վարչական դատարան`պահանջելով Բնապահպանության նախարարությունից «Նեմո» դելֆինարիումի շրջակա միջավայրի վրա ազդեցության գնահատական տալ: Արդեն իսկ չորս դատական նիստ է կայացել, սակայն ապարդյուն: Այս մասին «Առաջին լրատվական»-ի հետ զրույցում տեղեկացրեց Թռչնասերների կենտրոնի տնօրեն Սիլվա Ադամյանը`խոսելով հետագա անելիքների մասին:
Նա պնդեց, որ իրենց պահանջը դելֆինարիումում շրջակա միջավայրի վրա ազդեցության փորձաքննություն անցկացնելն է: Սիլվա Ադամյանը չի բացառում, որ չի բավարարվի իրենց պահանջը, սակայն դա պատճառ չէ, որ իրենք դադարեցնեն պայքարը: «Մենք շարունակելու ենք պայքարը. նորից փորձաքննության անցկացում ենք պահանջելու և դիմելու ենք միջազգային ատյաններին: Մեր մտահոգությունն այն է, որ Հայաստանում չպետք է գործի դելֆինարիում, որովհետև դելֆինների համար պայմաններ ստեղծված չեն, այսինքն` դելֆինարիումը չի կարող գործել, քանի որ չունի տարրական պայմաններ դելֆինների համար: Պետք է անցկացնի փորձաքննություն, որի ընթացքում պետք է քննվի այնտեղի ջուրը, շրջապատը, կլիման, ամեն մանրուք պետք է հաշվի առնել, ինչը չի արվել»,- մեկնաբանեց Սիլվա Ադամյանը`հավելելով, որ փորձաքննության անցկացման դեպքում շատ բան հնարավոր կլինի փոխել: Նրա համոզմամբ, առանց փորձաքննության աշխատել նշանակում է հակաօրինական գործունեություն ծավալել:
«Առաջին լրատվական»-ը զրուցեց նաև ջրաբան Քնարիկ Հովհաննիսյանի հետ, ով մեկնաբանելով մամուլի այն հրապարակումները, թե դելֆինարիումում քլորի մակարդակը բարձր է, ասաց, որ քլորի մեծ քանակությունը վնասակար է ոչ միայն մարդկանց, այլև կենդանիների և դելֆինների համար: «Պետք է 1 լիտրում լինի 0,3 միլիգրամ քլոր, դա կոչում են մնացորդային քլոր, իսկ դելֆինարիումում նույնիսկ քլորի նման քանակություն պետք է չլինի»,- նշեց Քնարիկ Հովհաննիսյանը`քլորի խտության հավաստի տվյալներ չունենալով: Նա պարզապես նշեց, որ չի կարելի դելֆինարիումում քլոր օգտագործել:
