Թուրքական Zaman թերթի փոխանցմամբ, Ստամբուլի կենտրոնական «Թաքսիմ» հրապարակում ընդդիմությունը կազմակերպել է բողոքի ակցիա։ Ակցիայի մասնակիցներն իրենց բուռն բողոքն են արտահայտել Ստամբուլի դատախազության այն որոշման դեմ, որն առնչվում է երկրի հիմնական ընդդիմադիր ուժ, «Ժողովրդա-հանրապետական» կուսակցության (ԺՀԿ) առաջնորդ Քեմալ Քըլըչդարօղլուին «Էրգենեկոն» գործի շրջանակներում քրեական պատասխանատվության ենթարկելուն։
Ստամբուլի դատախազությունը Քըլըչդարօղլուին անձեռնմխելիությունից զրկելու համար դիմել է երկրի խորհրդարանին։ Այս կապակցությամբ ԺՀԿ-ի հազարավոր համակիրներ Ստամբուլում իրենց զայրույթն են արտահայտել այդ որոշման դեմ։ Նրանք «զինված» են եղել ԺՀԿ-ի դրոշներով ու Քըլըչդարօղլուի նկարներով՝ վանկարկելով «Թուրքիայում տեղ չկա բռնապետության համար», «Էրդողանը բռնապետ է», «Էրդողա՛ն, հեռացի՛ր» և այլն։
Ոստիկանությունը չի միջամտել ակցիային։ Լրագրողների հետ զրույցում Քըլըչդարօղլուն հայտարարել է, որ ակցիան կրել է խաղաղ բնույթ. «Դա իմ համակիրների ձգտումն է ցույց տալու, որ իրենք համաձայն չեն բռնապետության որոշման հետ։ Ես չեմ վախենում ձերբակալությունից, սակայն ընդդիմության առաջնորդի դեմ քրեական գործ հարուցելն անհեթեթություն է։ Մենք իշխանություններին թույլ չենք տա երկրում ոչնչացնել ժողովրդավարությունը»։
Քըլըչդարօղլուն անդրադարձել է նաև հեղաշրջման կազմակերպման մեջ մեղադրվող Թուրքիայի զինված ուժերի Գլխավոր շտաբի նախկին (2008-2010) պետ Իլքեր Բաշբուղի կալանավորմանը. «Եթե Գլխավոր շտաբի պետն ահաբեկիչ է, ապա այդ դեպքում ո՞վ է վարչապետը։ Մեր ուղեղներում արդեն չի տեղավորվում, որ կարող ենք ունենալ ահաբեկիչ Գլխավոր շտաբի պետ»։
Հիշեցնենք, որ Թուրքիայի սահմանադրության 117-րդ հոդվածի համաձայն` Թուրքիայի զինված ուժերի Գլխավոր շտաբի պետին նախարարների խորհրդի առաջարկով նշանակում է երկրի նախագահը: Իր պարտականությունների ու լիազորությունների իրականացման ժամանակ նա պատասխանատու է երկրի վարչապետին:
