Ղարաբաղցի քաղաքագետ, Ղարաբաղի նախկին փոխարտգործնախարար Մասիս Մայիլյանը կարծում է, որ Հայաստանի ու Ադրբեջանի նախագահների հանդիպման անհրաժեշտություն կա:
Համաձայն մամուլում շրջանառվող տեղեկատվության, հունվարի 23-34-ը Ռուսաստանի Սոչի քաղաքում կայանալու են ղարաբաղյան հակամարտության լուծմանն ուղղված հերթական եռակողմ բանակցությունները` Ռուսաստանի, Հայաստանի և Ադրբեջանի նախագահների մասնակցությամբ:
Մասիս Մայիլյանն «Ազատություն» ռադիոկայանի հետ զրույցում ասել է, թե նման հանդիպումները, թեև չեն բերում հակամարտության վերջնական լուծման, գոնե կարող են ապահովել կայունություն տարածաշրջանում ու սահմանի վրա։
«Բայց որևէ ակնկալիքներ չունեմ, քանի որ հիմքեր չկան ինչ-որ լուրջ առաջընթացի համար», – ասել է ղարաբաղցի քաղաքագետը` հավելելով. «Այո, այդ հանդիպումները, որպես օրինակ, այնպիսի գործառույթ ունեն, որը ես դրական եմ գնահատում»։
Քանի դեռ չեն փոխվել բանակցությունների ձևաչափն ու մոտեցումները, Լեռնային Ղարաբաղի հակամարտության լուծման շուրջ տեղի ունեցող հանդիպումները էական փոփոխություն չեն բերի, վստահ է Մայիլյանը։
Քաղաքագետը կարծում է, որ հակամարտության լուծման համար դեռ 1990-ականներին սահմանված մոտեցումները պետք է փոխվեն: Առաջին հերթին, Լեռնային Ղարաբաղը պետք է դառնա բանակցության կողմ, ինչպես նաև հարկավոր է հետևել միջազգային օրինակներին, որպեսզի հնարավոր լինի վերջնականապես լուծել ղարաբաղյան հակամարտությունը։
«Ընդհանրապես, այս վերջին տարիների ընթացքում` սկսած 2008-ից, նորություններ կան թե՛ միջազգային հարաբերությունների մեջ, թե՛ միջազգային իրավունքի մեջ` Կոսովոյի, մնացած նոր պետությունների ճանաչման հետ կապված, և այդ մոտեցումները պետք է կիրառվեն նաեւ Արցախի դեպքում»,- ընդգծել է Մասիս Մայիլյանը։
2012թ. բեկումնային կլինի հակամարտության լուծման համար, եթե փոխվեն այդ մոտեցումները, հակառակ դեպքում` ղարաբաղցի քաղաքագետը նոր տարվանից ակնկալիքներ չունի. «Համարում եմ, որ այդ մոտեցումները հնացած են, և պետք է նոր սկզբունքներ առաջ քաշվեն, ինչպես նաև ձևաչափը բանակցությունների պետք է բերվի և այդ խեղված վիճակից պետք է դուրս գա։ Արցախը պետք է ընդգրկվի, որ որևէ առաջընթացի ակնկալիք լինի»։
Քաղաքագետը, միևնույն ժամանակ, կարևորում է երեք հասարակությունների միջև փոխադարձ վստահության ձևավորման անհրաժեշտությունը:
Բացի պաշտոնական հարաբերություններից, կարիք կա հայ և ադրբեջանցի հասարակությունների միջև մեղմելու թշնամական վերաբերմունքը: Այս խնդրով ավելի շատ զբաղվում են հասարակական կազմակերպությունները, մինչդեռ պետական կառույցները ևս պետք է ներգրավվեն այս գործում, կարծում է Մասիս Մայիլյանը։
