Իտալիայի պետական երկաթուղային Trenitalia ընկերությունը ստիպված էր իր կայքից հեռացնել Frecciarossa նոր գնացքների գովազդը, որի ուղևորները կարող էին ճանապարհորդել չորս դասով:
Ինչպես հայտնում է The Guardian-ը, ուղևորափոխադրողը հրաժարվել է գովազդային տեսահոլովակից, քանի որ նրան մեղադրում էին ռասիզմի մեջ:
Պարբերականը նշում է, որ վիրավորական հայտարարությունը առաջինը գրավել է բլոգեր Ալեսանդրո Ջիլիոլիի ուշադրությունը, որը L’espresso կայքում գրել է, որ Trenitalia գովազդում չորրորդ դասով (ամենաէժան) ուղևորվում է «գունավոր» ընտանիք: Մնացած բոլոր դասերով` «գործնական» և «առաջնային», պատկերված են սպիտակամորթ մարդիկ: Ընդ որում` «բիզնես դասի» նկարում ուղևորներ չեն եղել ընդհանրապես:
Ջիլիոլիի քննդատությունից հետո քննարկումներ են սկսվել սոցցանցերում: Twitter -ի և Facebook-ի որոշ օգտատերեր Trenitalia-ի գովազդն անվանել են «բացարձակ խտրականություն»:
Trenitalia-ի գովազդը կայքից և YouTube-ից հեռացվել է հունվարի 3-ին: Այն փոխարինել են նոր տեսահոլովակով, որտեղ չորրորդ դասից օգտվում է սպիտակամորթ ընտանիք: Ընդ որում` որոշ սևամորթ ուղևորներ ուղևորվում են «բիզնես-դասով»:
