Ամերիկացի հայտնի երգչուհի Արետա Ֆրանկլինը հայտարարել է, որ ամուսնանում է: Ինչպես հաղորդում է Associated Press-ը, 70-ամյա «սոուլի թագուհու» ընտրյալը Ուիլյամ Ուիլքերսոնն է, որի հետ երգչուհին երկար ժամանակ սերտ հարաբերություններ ունի:
Հարսանիքը նախատեսվում է գալիք ամռանը և, ամենայն հավանականությամբ, տեղի կունենա Մայամի Բիչում (Ֆլորիդա նահանգ): Պսակադրությունից հետո ընդունելություն տեղի կունենա անձնական զբոսանավի վրա:
Երգչուհին դեռ չի կողմնորոշվել, թե ով է կարելու հարսանեկան զգեստը: Որպես հնարավոր թեկնածուներ դիտվում են «Վալենտինո», «Վերա Վոնգ» և «Դոննա Կարան» նորաձևության տները:
Ֆրանկլինը սակայն չի ճշտել՝ արդյո՞ք արդեն կայացել է նշանադարությունը: Փոխարենը նա հումորով պատասխանել է. «Ոչ ես հղի չեմ»:
«Սոուլի թագուհու» առաջնեկը ծնվել է, երբ նա դեռ 14 տարեկան էր: Երգչուհին նախկինում ամուսնացած է եղել երկու անգամ: Երկու ամուսնություններն էլ ավարտվել են ապահարզանով:
