Ընդունված կանոն է, որ տարեվերջին ամփոփում են անցածը և որոշ առումով էլ բարձրաձայնում են ակնկալիքները նոր տարուց: Թեև մարդկության զարգացման առանցքը եղել է շեղումն ընդունված կանոններից, այդուամենայնիվ տարին երևի թե մեկ անգամ կարող է կանոնին մնալ հավատարիմ, առավել ևս, որ 2011 թվականն այդ իմաստով բավական նշանակալից տարի է:
Տարին նախընտրական է, հետևաբար անցածի ամփոփումն ու գալիքի հետ կապված ակնկալիքները սերտ միահյուսված են իրենց պատճառահետևանքային կապով: Տարվա մեծ մասը քանի որ անցավ նախընտրական իրավիճակում, գրեթե ամբողջ տարին, բավական դժվար է գնահատական տալ տեղի ունեցածին: Բանն այն է, որ 2011 թվականին սոցիալ-տնտեսական, մշակութային, մարզական և քաղաքական ոլորտում կատարված ամեն ինչի վրա առկա էր նախընտրական դրոշմը, և թերևս 2012 և 2013 թվականներին մենք լավագույնս կկարողանանք բնորոշել և գնահատել 2011 թվականը` անկախ այն բանից, թե ինչ քաղաքական զարգացումներ կլինեն 2012 թվականի մայիսին, կամ դրան հաջորդող օրերի ու շաբաթների, կամ տարիների ընթացքում:
Ամեն դեպքում այդ զարգացումները լինելու են 2011 թվականի իրադարձությունների արդյունքը կամ հետևանքը: Սակայն դատելով որոշակի փաստերից, կարելի է եզրակացնել, որ Հայաստանում առաջին անգամ ստեղծվել է մի իրավիճակ, որ ապագա զարգացումները հանրության մի զգալի մասի համար այլևս չեն ընկալվում կանխորոշվածության զգացումով: Ավելին` նույնիսկ իշխանական համակարգի համար այդ զարգացումները բավական անորոշ են: Սովորաբար կուռ և միասնական թվացող իշխանական համակարգը 2011 թվականին չնայած թվացյալ համաձայնությանը այդպես էլ չկարողացավ հավաքվել իրար գլուխ: Այդ տեսանկյունից 2011-ի գլխավոր առանձնահատկությունն այն է, որ նախորդ մի քանի տարիների գորշ միապաղաղության և կանխորոշվածության ֆոնին այն մի տեսակ ոչ սովորական տարի էր:
Անսովորությունների շարքը կարելի է երկար թվարկել, բայց խնդիրն այն է, որ այդ ամենն այդքան էլ վատ չէ, որքան կարող է թվալ առաջին հայացքից: Անսովոր տարիները երևի թե մեր կյանքը փոխելու առաջին նախանշանն է: Եթե սկսել են տեղի ունենալ այդքան մեծ չափի անսովորություններ, ապա կնշանակի, որ գորշությունը սկսել է տեղի տալ, ինչ-որ բան սկսել է դուրս գալ տոտալ վերահսկողությունից: և չնայած արտաքին բոլոր ցուցանիշներով, պաշտոնական և ոչ պաշտոնական վիճակագրությամբ մեր կյանքում ըստ էության ոչինչ չի փոխվել, միևնույնն է, 2011 թվականը կարելի է համարել մեծ ձեռքբերման տարի հենց այն իմաստով, որ սովորական միապաղաղությանը սկսել են փոխարինել անսովոր իրադարձությունները, այսինքն` սառույցը կոտրվել է, «հավերժական» ստատուս քվոն խախտվել:
