Ես երիտասարդ տարիներին քաղաքի փողոցներում մուրացկաններ չեմ տեսել: Հիմա քաղաքում շատացել են մուրացկանները: Ուզում եմ, որ այնքան հզոր լինի իմ պետությունը, որ մարդկանց օգնի, ապահովի աշխատանքով, որ ամեն մեկը զբաղվի իր աշխատանքով: Իսկ հիմա մեր երկրում մեծամասնությունն աշխատանք չունի: «Առաջին լրատվական»-ի հետ զրույցում անկեղծացավ երգիչ Արամոն:
Նրա խոսքով, աշխատանքի բացակայության պատճառով շատերը հեռանում են երկրից: «Անճար վիճակից մարդիկ լքում, հեռանում գնում են օտար երկիր, այդ օտար հողերում փորձում են իրենց հանապազօրյա հացը գտնել»,- ցավով նշեց Արամոն:
Նրա խոսքով, մարդիկ շատ բան չեն ուզում`ուզում են միայն գնալ աշխատանքի, գալ, իրենց երեխաներին ապահովել սնունդով, ուսմամբ, կարողանան կատարել կոմունալ վճարումներ, կարողանան հոգալ իրենց ընտանիքի բոլոր հոգսերը:
«Առաջին լրատվական»-ի այն հարցին` արդյոք երգիչն ամանորյա տոնական շունչ զգո՞ւմ է քաղաքում, մարդկանց հայացքում, նրանց շարժուձևում, պատասխանեց՝ մասամբ:
«Տեսնում եմ տխուր աչքեր: Տարիների ընթացքում դա չեմ նկատել, բայց հիմա տեսնում եմ, հոգսով լի, տխուր աչքեր են: Մոտենում է Նոր տարին, ամեն մարդ ուզում է իր հնարավորության սահմաններում այն նշել: Մարդիկ չեն տեսնում իրենց վաղվա օրը: Ես էլ չեմ ուզում տեսնել մարդկանց տխուր աչքերը, այդ նյարդային, սթրեսային վիճակները, ինչն ակնառու նկատվում է»,- ասաց նա:
Լուսանկարը` Bravo.am-ի
